కడప జిల్లా చింతకొమ్మదిన్నె మండలంలో కొప్పర్తి మెగా పారిశ్రామిక పార్కు పనులు శరవేగంగా జరుగుతున్నాయి. ఇటీవలే డిక్సన్ కంపెనీతో ప్రభుత్వం ఒప్పందం కుదుర్చుకోవడం వల్ల...ఈ పరిశ్రమకు కావలసిన షెడ్ల నిర్మాణం పనులను సర్కారు వేగవంతం చేసింది. ఒక్కో షెడ్డు 50 వేల చదరపు అడుగుల్లో....మొత్తం 2 లక్షల అడుగుల విస్తీర్ణంలో వీటిని నిర్మిస్తున్నారు. ఎండవేడిని తట్టుకునేలా ... లోపల ఉన్నవారికి ఎలాంటి రేడియేషన్ ప్రభావం లేకుండా... ఆధునిక ప్లాస్టిక్ షీట్లు, వాటి మధ్యలో రాక్‌పూల్‌తో పైకప్పు నిర్మాణం చేస్తున్నారు. 4 పెద్ద షెడ్లలో 2 షెడ్లు పూర్తి కావచ్చాయి. వచ్చేనెలాఖరుకు వీటిని డిక్సన్‌కు అందించే లక్ష్యంతో పనులు జరుగుతున్నాయి. ఇక్కడ డిక్సన్ ఎలక్ట్రానిక్స్ మ్యానిఫాక్షరింగ్ యూనిట్ ప్రారంభిస్తే... 3 వేల మంది స్థానికులకు ఉపాధి లభిస్తుందని అధికారులు భావిస్తున్నారు.
కొప్పర్తిలో చిన్న, మధ్యతరహా పరిశ్రమలు నెలకొల్పేందుకు దాదాపు 30 కంపెనీలు ఆసక్తి చూపుతున్నట్లు అధికారులు తెలిపారు. ఫార్మా, జనరల్ ఇంజినీరింగ్ సంస్థలు పెట్టుబడులు పెట్టేందుకు ప్రభుత్వానికి దరఖాస్తు చేసుకున్నాయి. హైదరాబాద్‌కు చెందిన 10ఫార్మా కంపెనీలకు ఏపీఐఐసీ ఇప్పటికే స్థలాన్ని కేటాయించింది. పిట్టీ ఇంజినీరింగ్ సంస్థ ఉక్కు, సిమెంట్ కర్మాగారాలకు అవసరమైన విడి భాగాలను తయారు చేసే యూనిట్లను ఇక్కడ నెలకొల్పేందుకు ఆసక్తి చూపుతోంది. పరిశ్రమలకు అవసరమైన విద్యుత్ కోసం సమీపంలో 132 కేవీ సబ్ స్టేషన్ నిర్మాణం పూర్తికావచ్చింది. సోమశిల వెనుక జలాల నుంచి 0.06 టీఎంసీల నీటిని పరిశ్రమలకు సర్కారుకేటాయించింది.