గోదారి నీటిని శ్రీశైలంలోకి మళ్లిస్తే రాష్ట్రం ఏడారే!

గోదావరి జలాలను శ్రీశైలంలోకి మళ్లించడమంటే... ఆంధ్రప్రదేశ్​ను తెలంగాణకు తాకట్టు పెట్టడమేనని రాజకీయ నేతలు, రైతు సంఘం నాయకులు అభిప్రాయ పడ్డారు. సీఎం జగన్​.... కేసీఆర్ చేతిలో కీలుబొమ్మగా మారుతున్నారని వారు విమర్శించారు.

రెండు తెలుగు రాష్ట్రాల ముఖ్యమంత్రులు గోదావరి జలాలను కృష్ణానదిలోకి తీసుకురావాలనే విషయంపై చర్చిస్తున్న సమయంలో... రాయలసీమకు తాగునీటి సమస్య ఎలా పరిష్కరిస్తారనే విషయం చర్చనీయాంశమైంది. ఈ అంశంపై కడప ప్రెస్ క్లబ్ లో సీపీఐ ఆధ్వర్యంలో "కృష్ణా, గోదావరి, పెన్నా నదుల అనుసంధానం-రాయలసీమ నీటి సమస్య" అనే అంశంపై చర్చ జరిగింది. మాజీమంత్రి మైసూరా రెడ్డి, పీసీసీ ఉపాధ్యక్షుడు తులసిరెడ్డి, కమ్యూనిస్టు నేతలు, రాయలసీమ రైతు సంఘం ప్రతినిధులు, రాజకీయ నాయకులు, మేథావులు హాజరయ్యారు.

కేసీఆర్ కుట్రలో భాగమే...
గోదావరి జలాలను శ్రీశైలంలోకి మళ్లించి తద్వారా నాగార్జునసాగర్ నుంచి పాలమూరు, రంగారెడ్డి, డిండి వంటి ఎత్తి పోతల పథకాలకు నీళ్లు మళ్లించుకోవడానికి కేసీఆర్ కుట్ర పన్నారని నేతలు మండిపడ్డారు. కేసీఆర్ పన్నే కుయుక్తులకు సీఎం జగన్ అవగాహన రాహిత్యంతో అంగీకరిస్తున్నారని తులసిరెడ్డి మండిపడ్డారు. గోదావరి మిగులు జలాలను వాడుకునే హక్కు దిగువ రాష్ట్రమైన ఆంధ్రప్రదేశ్​కు ఉంటుంది గానీ... కేసీఆర్ దయాదాక్షిణ్యాల మీద కాదనే విషయం జగన్ గుర్తు పెట్టుకోవాలని సూచించారు. గోదావరి జలాలను శ్రీశైలంలోకి మళ్లిస్తే రాష్ట్రాన్ని థార్ ఏడారిగా మారుస్తారని ఆందోళన వ్యక్తం చేశారు.

జగన్ దృష్టి సారించాలి...
రాయలసీమలో పెండింగులో ఉన్న ప్రాజెక్టులపై సీఎం జగన్​ దృష్టి సారించాలని రైతుసంఘం నేతలు కోరారు. రాష్ట్ర ప్రయోజనాలకు పట్టించుకోకుండా...తెలంగాణకు ప్రయోజనం చేకూర్చేలా వ్వవహరించడం సరికాదన్నారు. హంద్రీనీవా, గాలేరు నగరి రెండో దశ పనులు, బ్రహ్మం సాగర్కు నీటి తరలింపుపై జగన్​ చొరవ చూపాలని కోరారు.

నీటి కేటాయింపులో రాయలసీమకు జరుగుతున్న అన్యాయాన్ని జగన్ గుర్తించాలని నేతలు కోరారు. ప్రభుత్వం స్పందించకుంటే.. రాయలసీమకు అన్యాయం చేయాలని చూస్తే ఉద్యమించేందుకు సిద్ధంగా ఉండాలని తీర్మాణం చేశారు.