ఓ వాట్సప్ మెసేజ్ వైరల్ అయ్యింది. గల్ఫ్ దేశాల్లో ఉద్యోగాల ఆశ చూపుతూ.. ఓ నకిలీ ఏజెంటు చేస్తున్న మోసాలను బయటపెట్టింది. బాధిత మహిళ పంపిన ఆ సందేశం.. మరింత మంది మహిళలను కాపాడింది. పశ్చిమ గోదావరి జిల్లాలో ఈ ఉదంతం వెలుగుచూసింది. జిల్లా ఎస్పీ నవదీప్ సింగ్ తెలిపిన వివరాల ప్రకారం... ఘటన వివరాలు ఇవి.
దుబాయ్లో పడుతున్న వెతల నుంచి తమను రక్షించాలని తెలుగు మహిళలలు వాట్సప్ మెసేజ్ చేశారు. వైరల్ అయిన ఈ మెసేజ్ పై పోలీసులు దృష్టి పెట్టారు. విచారణలో నకిలీ ఏజెంట్... పశ్చిమ గోదావరి జిల్లా పాలకొల్లుకు చెందిన దొండ వెంకట సుబ్బారావు వ్యవహారం బయటపడింది. ఇతడే.. మాయమాటలతో మోసం చేస్తూ... మహిళలను దుబాయ్ పంపినట్లు తేలింది.
గల్ఫ్ దేశాల్లో ఉద్యోగాలు కల్పిస్తామని మహిళలను నమ్మించి లక్షలాది రూపాయలను వసూలు చేశాడు సుబ్బారావు. మొగల్తూరుకు చెందిన నాగలక్ష్మి అనే మహిళకు నర్స్ ఉద్యోగం ఇప్పిస్తానని ఆశచూపాడు. ఆమెతో లక్ష రూపాయలకు ఒప్పందం కుదుర్చుకున్నాడు. జూలై 14న ఆమెను శంషాబాద్ విమానాశ్రయం నుంచి దుబాయ్ పంపించాడు. దుబాయ్ చేరాక రెండు వారాల పాటు అక్కడే నాగలక్ష్మి వేచి చూసింది. తను మోసపోయానని గ్రహించింది. తనలాగే మరో ఐదుగురు మహిళలు ఉన్నారన్న నిజాన్ని తెలుసుకుంది. అంతా కలిసి భారత రాయబార కార్యాలయానికి వెళ్లి తమ గోడు తెలిపారు. తక్షణమే వారికి రిటర్న్ పాస్పోర్టు ఇప్పించిన అధికారులు... వారి ఊళ్లకు పంపించారు. సొంతూరుకు చేరిన నాగలక్ష్మి.. సుబ్బారావు చేసిన మోసంపై మొగల్తూరు పోలీస్ స్టేషన్లో ఫిర్యాదు చేసింది. ఆ ఫిర్యాదే.. నకిలీ ఏజెంటును కటకటాలపాలు చేసింది.