భారీ చోరీ కేసు ఛేదన.. బంగారు ఆభరణాలు స్వాధీనం

భీమవరంలోని ఓ బంగారు దుకాణంలో ఆభరణాల చోరీ కేసును పోలీసులు ఛేదించారు. నిందితుడి నుంచి సుమారు కోటి 50 లక్షల విలువైన నగలను స్వాధీనం చేసుకున్నారు.

పశ్చిమ గోదావరి జిల్లా భీమవరంలోని ప్రకాశం చౌక్​ వద్ద ఉన్న మద్దుల వెంకట కృష్ణారావు బంగారు దుకాణంలో ఈ నెల 1న దొంగతనం జరిగింది. అర్థరాత్రి వేళ దుకాణంలోని చొరబడిన దుండగుడు... బంగారు, వెండి ఆభరణాలను దొంగిలించాడు. రాష్ట్రవ్యాప్తంగా సంచలనం స్పష్టించిన ఈ కేసును పోలీసులు వారం తిరిగే లోగానే ఛేదించారు. సీసీ పుటేజ్ ఆధారంగా నిందితుడిని గుర్తించి అరెస్టు చేశారు. జిల్లాలోని ఉండి మండలం కొత్తపేట గ్రామానికి చెందిన చంద్రారావు ఈ చోరీకి పాల్పడినట్లు గుర్తించారు. అతన్ని అదుపులోకి తీసుకుని విచారించగా... దొంగతనాన్ని అంగీకరించాడు. నిందితుడి నుంచి సుమారు కోటి 50 లక్షల విలువైన 4 కేజీల బంగారం... కేజీ 300 గ్రాముల వెండి వస్తువులను రికవరీ చేశారు. ఈ కేసును త్వరితగతిన ఛేదించిన పోలీసు సిబ్బందికి జిల్లా ఎస్పీ రవి ప్రకాశ్ రివార్డు అందించారు.