అగ్నిపథ్‌ ఆందోళనల కారణంగా శుక్రవారం తెలంగాణ సహా దేశవ్యాప్తంగా పలు రాష్ట్రాల్లో తీవ్ర విధ్వంసం చోటు చేసుకున్న నేపథ్యంలో.. రైల్వే శాఖ మరింత అప్రమత్తమైంది. అగ్నిపథ్‌ సెగ ఆంధ్రప్రదేశ్‌కి తగలకుండా ఉండేందుకు రైల్వే అధికారులు ముందస్తు చర్యలు చేపట్టారు.
విశాఖ రైల్వే స్టేషన్ సమీపంలో అనుమానస్పదంగా ఉన్న ఓ యువకుడిని పోలీసులు గుర్తించారు. స్టేషన్కు ఏ మార్గం ద్వారా చేరుకోవాలో.. వాట్సాప్లో పెద్ద ఎత్తున పోస్టు చేస్తున్నట్లు గుర్తించి.. అదుపులోకి తీసుకున్నారు. భద్రతా కారణాల దృష్ట్యా విశాఖపట్నం రైల్వేస్టేషన్‌ను మధ్యాహ్నం వరకు మూసివేస్తున్నట్లు అధికారులు ప్రకటించారు. స్టేషన్‌లోకి ఎవరినీ అనుమతించబోమని అధికారులు స్పష్టం చేశారు. కాగా, మరోవైపు విజయవాడ నుంచి వచ్చే రైళ్లన్నీ దువ్వాడ వద్ద, హవ్‌డా నుంచి వచ్చే వాటిని కొత్తవలస వద్ద నిలిపివేసి, దారి మళ్లించనున్నట్లు రైల్వే అధికారులు వెల్లడించారు.