విశాఖ పశ్చిమ నియోజకవర్గంలో మాజీ డిప్యూటీ మేయర్ దాడి సత్యనారాయణ, 60వ వార్డు వైకాపా అభ్యర్థి పీవి సురేష్ మధ్య మరోసారి విభేదాలు భగ్గుమన్నాయి. జీవీఎంసీ పరిధిలోని మరిడిమాంబ కల్యాణ మండపంలో బుధవారం ‘జగనన్న తోడు’ ప్రారంభ కార్యక్రమం ఏర్పాటు చేశారు. అక్కడి గేటు వద్ద పెట్టిన పీవీ సురేష్ ఫ్లెక్సీని తొలగించాలని, పక్క వార్డు నాయకుడి ఫ్లెక్సీ ఇక్కడెందుకంటూ దాడి సత్యనారాయణ ఆగ్రహించారు. ఫ్లెక్సీని తొక్కేశారు.
అక్కడే ఉన్న సురేష్, ఆయన అనుచరులు వాగ్వాదానికి దిగారు. సత్యనారాయణ అనుచరులు వారితో ఘర్షణ పడ్డారు. అక్కడికి చేరుకున్న పశ్చిమ వైకాపా ఇన్‌ఛార్జి మళ్ల విజయప్రసాద్‌ దృష్టికి విషయాన్ని తీసుకువెళ్లారు. దాడి సత్యనారాయణతోపాటు తన అనుచరులు ఫ్లెక్సీ తొలగించారంటూ పిల్లా లక్ష్మణరావు (సురేష్ అనుచరుడు) ఇచ్చిన ఫిర్యాదు మేరకు కేసు నమోదు చేశామని మల్కాపురం పోలీసులు తెలిపారు.