ఫైవ్​ స్టార్ హోటల్​లో బసచేశాడు... 13 లక్షల బిల్లు ఎగ్గొట్టాడు...

హోటల్​లో ఒకపూట భోజనం చేసి బిల్లు చెల్లించకుండా వెళ్తే... నానా హంగామా సృష్టించి పోలీసులకు ఫిర్యాదు చేస్తారు. కానీ ఓ వ్యక్తి ఏకంగా 102 రోజులు స్టార్​ హోటల్​లో బస చేసి దాదాపు 13 లక్షల రూపాయల బిల్​ ఎగ్గొట్టి చాకచక్యంగా అక్కణ్నుంచి మాయమయ్యాడు.

విశాఖపట్నం జిల్లా కిర్లంపూడి లేఅవుట్​లో నివాసముంటున్న అక్కిశెట్టి శంకర్​నారాయణ్​ అనే వ్యాపారి గతేడాది హైదరాబాద్​ బంజారాహిల్స్​లోని తాజ్​ బంజారా హోటల్​లో దిగాడు. తాను నగరానికి వచ్చినప్పుడల్లా హోటల్​ గది సిద్ధంగా ఉంచాలని చెప్పడం... తరచుగా వస్తారని ధర తగ్గించి మరీ రూమ్​ ఇచ్చారు హోటల్​ సిబ్బంది.

102 రోజులు... రూ.25 లక్షలు

సుమారు 102 రోజులు బస చేసినందుకు అయిన రూ.25.96 లక్షల బిల్లులో 13.62 లక్షలు చెల్లించాడు. ఈ ఏడాది ఏప్రిల్​ 15న బిల్లు చెల్లించకుండా గదిలోంచి మాయమయ్యాడు. అప్పటి నుంచి బకాయిలు చెల్లించాలని పలుమార్లు హోటల్​ యాజమాన్యం శంకర్​నారాయణ్​కు ఫోను చేసినా స్పందించలేదు. తరువాత ఫోన్​ స్విచ్ఛాఫ్​ చేశాడు. ఎన్నిసార్లు ఫోన్​ చేసినా స్పందించకపోవడం వల్ల తాజ్​ బంజారా జనరల్​ మేనేజర్​ హితేంద్రశర్మ బంజారాహిల్స్​ పోలీస్​ స్టేషన్​లో చీటింగ్​ కేసు నమోదు చేశారు. పోలీసులు ఇప్పుడు శంకర్ నారాయణ కోసం వెతుకుతున్నారు.

• ఇదీ చూడండి : థర్మకోల్​ పడవల్లో ప్రమాదకర ప్రయాణం