ఫిబ్రవరి 14... ప్రపంచంలోని ప్రేమికులందరికీ ఇష్టమైన రోజు. ఇప్పుడు ప్రేమికులరోజు ఓ వ్యాపారంగా మారిపోయింది. ఈ రోజు కోసం యువతీయువకుల కన్నా గిఫ్టుషాపుల వాళ్లే ఆతృతగా ఎదురు చూస్తున్నారు. ఇంతకీ వాలంటైన్స్ డే ఎప్పుడు వ్యాపారంగా మారింది?.
తమ ప్రేమను తెలియజేసేందుకు వారం రోజుల ముందు నుంచే లవర్స్ ఆలోచిస్తుంటారు. టెడ్డీబేర్ ఇస్తే బాగుంటుందా? ఖరీదైన గ్రీటింగ్ కార్డు ఇద్దామా...? లేదంటే స్విస్ చాక్లెట్ల బాక్స్ ఇస్తే ఎలా ఉంటుందో అని హైరానా పడతారు. వీటన్నింటితో లాభపడేది మాత్రం గిఫ్టు షాపుల వాళ్లు మాత్రమే.
గ్రీటింగ్ కార్డుల నుంచి గోల్డ్ రింగ్ల వరకు వచ్చింది. తమకు నచ్చినవారికి ఎంత ఖరీదైన బహుమతి ఇస్తే అంత ప్రేముంటుందనే భ్రమనే వ్యాపారులకు వరంగా మారింది. ఒకరు ఖరీదైన వాచ్ ఇస్తే మరొకరు బ్రాండెడ్ డ్రెస్, ఇంకొకరు గోల్డ్ రింగ్ ఇలా కాస్ట్లీ గిఫ్ట్లు కొనడం ప్రారంభమైంది. అందుకే షాపుల వాళ్లు వాలంటైన్ డే స్పెషల్ డిస్కౌంట్లు అంటూ ప్రేమికులను ఊరిస్తున్నారు.