Nara Lokesh 'Yuvagalam' 30th Day Padayatra Updates: 'యువగళం' పాదయాత్రలో నారా లోకేశ్ సెల్ఫీ ఛాలెంజ్‌ కొన‌సాగుతూనే ఉంది. వైఎస్ జగన్ మోహ‌న్ రెడ్డిని ఎద్దేవా చేస్తూ.. టీడీపీ ప్ర‌భుత్వ హ‌యాంలో వచ్చిన కంపెనీలు, తెచ్చిన సంస్థ‌ల ముందు ఆయన సెల్ఫీలు దిగుతున్నారు. అనంతరం 'మేము తెచ్చిన‌వి ఇవి,.. నువ్వు ఏం తెచ్చావు జగన్' అంటూ సెటైరిక్‌గా ప్ర‌శ్నిస్తూ వ‌స్తున్నారు. తిరుపతి నియోజకవర్గంలో మంగ‌ళ‌వారం పాద‌యాత్ర‌గా వెళ్తూ ఐతేప‌ల్లి వ‌ద్ద కాండోర్ ఇంటర్నేషనల్ స్కూల్ ముందు నారా లోకేశ్ సెల్ఫీ దిగారు. 70 ఏళ్ల‌కి పైగా చ‌రిత్ర‌గ‌లిగిన ప్ర‌ఖ్యాత విద్యా సంస్థ కాండోర్ టీడీపీ హ‌యాంలోనే ఏర్పాటైందని గుర్తు చేశారు. ఈ సంస్థ‌కు అప్ప‌ట్లో చంద్ర‌బాబు సర్కారు 8 ఎక‌రాల భూమిని కేటాయించిందన్నారు. ఇప్ప‌టివ‌ర‌కూ టీడీపీ కృషితో వచ్చిన ఉద్యోగ, ఉపాధి క‌ల్పించే కంపెనీలు-సంస్థ‌ల ముందు లోకేశ్ ఫోటోలు దిగుతూ.. సీఎం జగన్‌కు ఛాలెంజ్‌లు విసిరారు. కాండోర్ ముందు సెల్ఫీ దిగిన అనంతరం 'ఇది మేము తెచ్చిన ప్ర‌ఖ్యాత విద్యా సంస్థ అని మేము గ‌ర్వంగా ప్ర‌క‌టిస్తాము' అని లోకేశ్ పేర్కొన్నారు.
తిరుపతి జిల్లా చంద్రగిరి నియోజకవర్గంలో నారా లోకేశ్ యువగళం పాదయాత్ర 30వ రోజు కొనసాగుతోంది. ప్రజలు పెద్ద ఎత్తున పాదయాత్రలో పాల్గొంటూ.. మంగళ హారతులతో మహిళలు ఎక్కడికక్కడ స్వాగతం పలుకుతున్నారు. ప్రజల సమస్యలు వింటూ వాటి పరిష్కారానికి భరోసా ఇస్తూ, యువనేత ముందుకు సాగుతున్నారు. పాదయాత్రకు ముందు లోకేశ్ రజకులతో ముఖాముఖి నిర్వహించారు. అధికారంలోకి వచ్చిన మొదటి వంద రోజులలోపు రజక భవనాలకు భూమి కేటాయిస్తామని హామీ ఇచ్చారు.