NVS 01 Satellite Project Director KVS Bhaskar: "నావిగేషన్ ఉపగ్రహం ఎన్వీఎస్-01 తయారు చేయడానికి మూడు సంవత్సరాల సమయం పట్టింది. ఇందులో యూ ఆర్ రావు శాటిలైట్ సెంటర్ శాస్త్రవేత్తలు భాగస్వాములు అయ్యారు. అటామిక్ క్లాక్ తయారీకి ఎక్కువ సమయం పట్టింది. ఇక నుంచి ఆరు నెలలకు ఒకసారి నావిగేషన్ ఉపగ్రహాలను కక్ష్యలోకి పంపనున్నాం" ఈ మాటలన్నది మన తెలుగు బిడ్డ కేవీఎస్ భాస్కర్. షార్లో సోమవారం విజయవంతంగా నిర్వహించిన జీఎస్ఎల్వీ-ఎఫ్12 ప్రయోగంలో ఈయన తనవంతు పాత్ర పోషించారు.
ఎన్వీఎస్-01 ఉపగ్రహ ప్రాజెక్టు డైరెక్టర్ కేవీఎస్ భాస్కర్.. భారత అంతరిక్ష పరిశోధనా కేంద్రం శ్రీహరికోటలోని సతీష్ ధవన్ స్పేస్ సెంటర్లోని అంతరిక్ష కేంద్రీయ పాఠశాలలో చదువుకున్నారు. ఉమ్మడి తూర్పు గోదావరి జిల్లా కాకినాడకు చెందిన గణపతిరావు, సుబ్బులక్మి దంపతుల కుమారుడు కేవీఎస్ భాస్కర్. గణపతిరావు సతీశ్‌ ధవన్ స్పేస్ సెంటర్లో ఎలక్ట్రికల్‌ ఇంజినీర్‌గా పని చేశారు. ఆ సమయంలో భాస్కర్ ఇక్కడి పాఠశాలలో ఒకటి నుంచి పదో తరగతి వరకూ చదువుతూ శాస్త్ర సాంకేతిక పరిజ్ఞానాన్ని పుణికి పుచ్చుకున్నారు. భాస్కర్.. చదువుకునే సమయం నుంచి రాకెట్ ప్రయోగాలపై మక్కువ చూపారు. అప్పుడే తను శాస్త్రవేత్త కావాలని నిర్ణయించుకున్నారు.
"నావిగేషన్ ఉపగ్రహం ఎన్వీఎస్-01 తయారు చేయడానికి మూడు సంవత్సరాల సమయం పట్టింది. ఇందులో యూఆర్రావు శాటిలైట్ సెంటర్ శాస్త్రవేత్తలు భాగస్వాములు అయ్యారు. అటామిక్ క్లాక్ తయారీకి ఎక్కువ సమయం పట్టింది. ఇక నుంచి ప్రతి ఆరు నెలలకోసారి నావిగేషన్ ఉపగ్రహాలను కక్ష్యలోకి పంపనున్నాం."-కేవీఎస్ భాస్కర్, ఎన్వీఎస్-01 ఉపగ్రహ ప్రాజెక్టు డైరెక్టర్
ఆ తర్వాత కేంద్ర పాలిత ప్రాంతం యానాంలో ఇంటర్ పూర్తి చేసి, దుర్గాపూర్ ఆర్ఈసీ(ఎన్ఐటీ)లో ఎలక్ట్రానిక్ కమ్యూనికేషన్ ఇంజినీరింగ్ చదివారు. అనంతరం బిట్స్ పిలానీలో ఎంటెక్(ఎలాక్ట్రానిక్స్ అండ్ కంట్రోల్ సిస్టమ్) పూర్తి చేశారు. ఆపై 1990లో బెంగుళూరులోని యూఆర్రావు శాటిలైట్ సెంటర్లో ఉద్యోగంలో చేరారు. అంచెలంచెలుగా కష్టపడి ఉపగ్రహ ప్రాజెక్టు డైరెక్టర్ స్థాయికి ఎదిగారు. తాజాగా ఎన్వీఎస్-01 ఉపగ్రహ ప్రాజెక్టు డైరెక్టర్‌గా వ్యవహరిస్తున్నారు. ఎన్వీఎస్ సిరీస్‌లో జరగనున్న నాలుగు ప్రయోగాలూ భాస్కర్ సారథ్యంలోనే జరగనున్నాయి.
అసలేమిటి ఎన్వీఎస్-01: తిరుపతి జిల్లాలోని షార్ నుంచి రెండో తరం నావిక్‌ ఉపగ్రహాల్లో మొదటిదైన ఎన్వీఎస్ 01 శాటిలైట్‌ను ఇస్రో విజయవంతంగా కక్ష్యలోకి ప్రవేశపెట్టింది. సుమారు 2వేల 232 కిలోల బరువున్న ఈ ఉపగ్రహ జీవితకాలం 12 సంవత్సరాలు. భారత్‌ ప్రధాన భూభాగం చుట్టూ 15 వందల కిలోమీటర్ల పరిధిలో రియల్‌ టైమ్‌ పొజిషనింగ్‌ సేవలను ఇది అందిస్తుంది. ఈ ఉపగ్రహానికి చాలా ప్రత్యేకతలు ఉన్నాయి. ఇందులో రుబిడియం అణుగడియారం ఉంది. అతి తక్కువ దేశాల వద్దే ఉన్న ఈ సాంకేతికతను భారత్‌ సొంతంగా అహ్మదాబాద్‌ స్పేస్ అప్లికేషన్‌ సెంటర్లో అభివృద్ధి చేసింది.
