BJP LEADERS RESIGN THEIR POSTS : రాష్ట్ర బీజేపీ నేతల్లో అసంతృప్తి స్వరాలు బయటకొస్తున్నాయి. రెండు రోజుల క్రితం ఆరు జిల్లాలకు నూతన అధ్యక్షులు, రాష్ట్ర కార్యవర్గ సభ్యుల నియామకాల్లో పలు మార్పులు చేస్తూ పార్టీ రాష్ట్ర అధ్యక్షుడు సోము వీర్రాజు నిర్ణయం తీసుకున్నారు. శ్రీకాకుళం, అనకాపల్లి, రాజమహేంద్రవరం(తూర్పు గోదావరి జిల్లా), కృష్ణా, నరసరావుపేట(పల్నాడు జిల్లా), ప్రకాశం జిల్లాలకు నూతన అధ్యక్షుల నియామకాలు చేశారు. ఈ ఆరు జిల్లాలకు పని చేసిన అధ్యక్షులను పార్టీ రాష్ట్ర కార్యవర్గ సభ్యులుగా అవకాశం కల్పించారు. దీనిపై అధికారికంగా పార్టీ రాష్ట్ర అధ్యక్షుని నుంచి లేఖ బయటకొచ్చింది.
ఆ తర్వాత ప్రస్తుతం రాష్ట్ర కార్యవర్గ సభ్యునిగా.. శ్రీకాకుళం జిల్లా ఇంఛార్జిగా వ్యవహరిస్తున్న చిగురుపాటి కుమారస్వామి పార్టీ తనకు అప్పగించిన బాధ్యతలకు రాజీనామా చేస్తున్నట్లు ప్రకటించారు. ఈ మేరకు పార్టీ రాష్ట్ర అధ్యక్షుడు సోము వీర్రాజుకు లేఖ రాశారు. జిల్లా అధ్యక్షుల మార్పుపై ఎవరినీ సంప్రదించకుండా ఏకపక్షంగా నిర్ణయం తీసుకున్నారని.. ఇది రాష్ట్ర బీజేపీ చరిత్రలో ఏనాడూ లేదంటూ తన అసంతృప్తిని వ్యక్తం చేస్తూనే.. సోము వీర్రాజు ఒంటెద్దు పోకడలకు నిరసనగా తన బాధ్యతలకు రాజీనామా చేస్తున్నట్లు తన లేఖలో పేర్కొన్నారు.