ప్రకాశం జిల్లా మద్దిపాడు మండలంలో 21 పంచాయతీల్లో చెత్త నుంచి సంపద కేంద్రాలు 15 ఏర్పాటు చేశారు. అందులో భాగంగా ఎన్నికలకు ముందు మండలంలో ప్రతి గ్రామానికి చెత్తను సేకరించేందుకు ఒక ఆటోను కేటాయించారు. కానీ వాటిని ఉపయోగించకుండా అలానే వదిలేశారు. ఆ వాహనాలకు కేటాయించిన లబ్ధిదారులను రికార్డుల్లో చూపించారే కానీ వారికి అవి అందని కారణంగా.. పూర్తిగా పాడైపోయాయి.
లబ్ధిదారులు వాటిని అప్పగించాలని కోరినా.. ప్రభుత్వం నుంచి ఎటువంటి అనుమతులు లేవని అధికారులు మాట దాటేస్తున్నారు. ప్రజాధనాన్ని ఇలా దుర్వినియోగం చేస్తున్నారని కొందరు ఈ విషయంపై ఆగ్రహం వ్యక్తం చేస్తున్నా.. ఎవరూ పట్టించుకోవటం లేదు. ఎప్పటికైనా అధికారులు స్పందించి వ్యర్ధాల నుంచి సంపద కేంద్రాలకు ఉద్దేశించిన ఈ ఆటోలను త్వరితగతిన లబ్ధిదారులకు అందించాలని గ్రామస్ధులు కోరుతున్నారు.