Chintamaneni Prabhakar : పోలీసులు తన పట్ల అమానుషంగా ప్రవర్తించారని టీడీపీ సీనియర్ నేత చింతమనేని ప్రభాకర్ ఆరోపించారు. రేపు చింతమనేని పుట్టినరోజు సందర్బంగా ఏలూరు ప్రభుత్వాస్పత్రి వద్ద రక్తదాన శిబిరం ఏర్పాటు చేయగా పోలీసులు అడ్డుకున్నారు. ఆస్పత్రి వద్దకు వచ్చిన చింతమనేని ప్రభాకర్ను పోలీసులు ఆస్పత్రిలోకి అనుమతించ లేదు. చింతమనేనిని అరెస్టు చేసి స్టేషన్‌కు తరలించారు. ఈ క్రమంలో పోలీసులు దురుసుగా ప్రవర్తించడంతో చింతమనేని చొక్కా చినిగిపోయింది. దీంతో పోలీసులపై చింతమనేని ఆగ్రహం వ్యక్తం చేసారు.
ఏలూరు ప్రభుత్వ ఆసుపత్రి వద్ద రక్తదాన శిబిరం ఏర్పాటు చేయటం తప్పా అని చింతమనేని ప్రశ్నించారు. హరిరామ జోగయ్య అదే ఆసుపత్రి వద్ద ఉన్నారనే వంకతో తన కార్యక్రమం అడ్డుకున్నారని ఆగ్రహం వ్యక్తం చేశారు. హరిరామ జోగయ్యను పరామర్శిస్తే తప్పేంటని అన్నారు. ఇప్పటికే తనపై పదుల సంఖ్యలో కేసులు నమోదు చేశారని.. అన్నింటికీ తెగించే ఉన్నానని అన్నారు. జగన్మోహన్ రెడ్డి తాత దిగొచ్చినా తెలుగుదేశం పార్టీని ఏమీ చేయలేరని దుయ్యబట్టారు.