నందిగామ నగర పంచాయతీకి ప్రభుత్వం నాలుగు లక్షల రూపాయలు వెచ్చించి మూడేళ్ల క్రితం ఓపెన్ జిమ్ పరికరాలు ఏర్పాటు చేసింది. ప్రజలు వ్యాయామాలు చేసుకునేందుకు వీలుగా వీటిని బహిరంగ ప్రదేశంలో అందరికీ ఉపయోగపడే విధంగా బిగించాలని ఆదేశాలు ఇచ్చారు. గత ప్రభుత్వంలో ఈ పరికరాలను పట్టణంలోని మూడు ప్రాంతాల్లో అమార్చాలని స్థానిక నగర పంచాయతీ పాలకవర్గ తీర్మానించింది. ఇప్పటికీ ఈ తీర్మానం ఆచరణలోకి రాలేదు.
అనంతరం ప్రభుత్వం మారటంతో స్థానిక ఎమ్మెల్యే మొండితోక జగన్మోహనరావు.. ఈ పరికరాలు అన్ని ఒకే చోట బహిరంగ ప్రదేశంలో అమరిస్తే ఉపయోగకరంగా ఉంటుందని భావించారు. దీనికి అనుగుణంగా స్థలం పరిశీలించాలని కమిషనర్ ఆదేశించారు. పరికరాలు అమర్చేందుకు నగర పంచాయతీ నుంచి 50 వేల రూపాయలు మంజూరు చేశారు. కేవలం స్థలం ఖరారు కాకపోవడం వల్లనే.. పరికరాలు మూడేళ్లుగా మూలన మగ్గుతున్నాయి. దీనిపై పాలకులు, అధికారులకు సమన్వయం లేకపోవడం సమస్యగా మారింది.