ఇంధన భారం రూ.217 కోట్లు

బండిలో పోయకముందే ఇంధనం భగ్గుమంటోంది. తొమ్మిది రోజుల్లోనే లీటరు పెట్రోలుపై రూ.5.03, డీజిల్‌పై రూ.4.92 ధరలు పెరిగాయి. లీటరుకు మరో రూ.2 వరకు పెరిగే అవకాశం ఉందనే ఇంధన సంస్థల అంచనాలతో వాహనదారులు ఆందోళన చెందుతున్నారు.

ఇంధన ధరలు పెరిగిపోయాయి. బండిలో పెట్రోలు పోయించుకోవాలంటే సామాన్య ప్రజలు భయపడుతున్నారు. లాక్‌డౌన్‌తో ఉపాధి కోల్పోయి ఆదాయం తగ్గిన సమయంలో ఈ ధరల పెంపు మరింత భారంగా మారుతుందని వాపోతున్నారు. ఖరీఫ్‌ రోజుల్లో సాగు ఖర్చులూ పెరుగుతాయని రైతులు వాపోతున్నారు. పెట్రోలు, డీజిల్‌ ధరలు ఈ నెల 7 నుంచి పెరుగుతూనే ఉన్నాయి. సగటున రోజుకు 50 పైసల నుంచి 65 పైసల వరకూ పెరిగాయి.

వాహన యజమానులకు అదనపు ఖర్చు

రాష్ట్రంలో నెలకు 3 లక్షల కిలోలీటర్ల డీజిల్‌, 1.20 లక్షల కిలోలీటర్ల పెట్రోలు విక్రయిస్తున్నారు. పెరిగిన ధరల ప్రకారం చూస్తే డీజిల్‌ వినియోగదారులపై నెలకు రూ.147.60 కోట్లు, పెట్రోలు వినియోగదారులపై రూ.60.36 కోట్ల చొప్పున మొత్తంగా రూ.217 కోట్ల భారం పడుతోంది. డీజిల్‌ ధరల పెరుగుదల వల్ల వాహన యజమానులు ఒక్కో కిలోమీటరుకు సగటున రూ.1.25 అదనంగా వెచ్చించాలి. ఓ లారీ వెయ్యి కి.మీ. వెళ్లి రావాలంటే రూ.2,500 వరకు అదనంగా ఖర్చవుతోంది. దీనికి అనుగుణంగా రవాణా ఛార్జీలు పెంచడమో.. లేదంటే సరకు రవాణా నిలిపేయడమో చేయాల్సిందేనని లారీల యజమానులు పేర్కొంటున్నారు.

రైతుకు రూ.490 కోట్ల మోత

ఇంధన ధరల పెరుగుదల నేపథ్యంలో సాగు ఖర్చులు ఎకరాకు సగటున రూ.500పైనే పెరుగుతాయనే ఆందోళన రైతుల్లో వ్యక్తమవుతోంది. ఖరీఫ్‌లో 98 లక్షల ఎకరాల్లో పంటలు సాగవుతున్నాయి. మొత్తంగా చూస్తే రూ.490 కోట్ల మేర రైతులపై భారం పడనుంది.

ఆటో డ్రైవర్లకు కష్టం

ఆటోలకు కిరాయిలు తగ్గాయి. ఇద్దరికి మించి ఎక్కించుకోకూడదనే నిబంధన ఉంది. అలా చేస్తే గతంలో అయిదుగురికి రూ.100 వచ్చే బాడుగ ఇప్పుడు రూ.40కే పరిమితమవుతోంది. రూ.73.53 పెట్టి లీటరు డీజిల్‌ కొట్టిస్తే సగం కూడా రాదని డ్రైవర్లు ఆవేదన వ్యక్తం చేస్తున్నారు. రోజుకు 5 లీటర్ల డీజిల్‌ నింపినా.. రూ.25 వరకు ఒక్కొక్కరిపై భారం పడుతుంది.

ఇదీ చదవండి:శాసనసభ బడ్జెట్ సమావేశాలు.. రెండు రోజులే..!