ఐదేళ్ల క్రితం తప్పిపోయి..పోలీసుల సహకారంతో..

ఐదు సంవత్సరాల క్రితం తప్పిపోయిన వ్యక్తి ఆచూకీని విజయవాడ పోలీసులు కనుగొని.. కుటుంబ సభ్యులకు అప్పగించారు. చెన్నైకు చెందిన ఓ ఎన్జీఓ సంస్థ సహకారంతో బాధితుడిని వారి కుటుంబసభ్యుల వద్దకు చేర్చారు.

కృష్ణా జిల్లా వత్సవాయి మండలంలోని పోలంపల్లి గ్రామానికి చెందిన పుల్లారావు.. ఐదు సంవత్సరాల క్రితం తప్పిపోయాడు. మానసిక సమస్యతో బాధపడుతూ తమిళనాడులోని శివగంగి జిల్లాకు చేరుకున్నాడు. చెన్నైకు చెందిన ఓ ఎన్జీఓ సంస్థ పుల్లారావును గుర్తించి చేరదీసింది. అతనికి చికిత్స అందించి, పూర్వస్థితికి తీసుకువచ్చారు. పుల్లారావు ఇచ్చిన సమాచారం ప్రకారం.. పేరు, ఫొటో, వివరాలను విజయవాడ పోలీస్ కమిషనర్​కు పంపించారు.

విజయవాడ నగర కమిషనర్ బి.శ్రీనివాసులు ఆదేశాల మేరకు విజయవాడ స్పెషల్ బ్రాంచ్ పోలీసులు తప్పిపోయిన వ్యక్తి కుటుంబసభ్యులను గుర్తించారు. వారిని తమిళనాడుకు పంపించి పుల్లారావును వారికి అప్పగించారు. ఈ కేసులో ప్రత్యేక చొరవ తీసుకున్న ఎన్జీఓ సంస్థను, పోలీసులను బాధిత కుటుంబసభ్యులు అభినందించారు.

ఇదీచదవండి.