రైలు ప్రయాణికులకు శుభవార్త.. పెరగనున్న వేగం : ఎస్​సీఆర్​

దక్షిణ మధ్య రైల్వే పరిధిలోని పలు మార్గాల్లో రైళ్ల వేగం త్వరలో పెరగనుంది. ఈ మేరకు రైళ్ల వేగం పెంచేందుకు దక్షిణ మధ్య రైల్వే చర్యలు తీసుకుంది. అందుకు అనుగుణంగానే ఇప్పటికే అధికారులు రైలు ట్రాక్​ను సిద్ధం చేశారు. ఫలితంగా రైళ్ల వేగం గంటకు 130 కిలోమీటర్లకు పెంచనున్నారు.

దక్షిణ మధ్య రైల్వే పరిధిలోని పలు మార్గాల్లో నడిచే ప్యాసింజర్, ఎక్స్ ప్రెస్ రైళ్ల వేగం త్వరలో పెరగనునట్లు అధికారులు తెలిపారు. ఈ నేపథ్యంలో అధికారులు రైలు ట్రాక్​ను ఇప్పటికే సిద్ధం చేశారు. ప్రస్తుతం సామర్థ్య పరీక్షలు నిర్వహిస్తున్నారు. పలు మార్గాల్లో రైళ్ల వేగం గంటకు 110 కిలోమీటర్లు ఉండగా.. దాన్ని ఇకపై గంటకు 130 కిలోమీటర్లకు పెంచనున్నారు.

పలు సెక్షన్లలో వేగం పెరుగుదల..

దక్షిణ మధ్య రైల్వే పరిధిలోని బల్హార్ష - కాజీపేట- విజయవాడ- గూడూరు, విజయవాడ- విశాఖపట్నం, అలాగే వాడి - గుత్తి-రేణిగుంట సెక్షన్లలోని రూట్లలో నడిచే పలు రైళ్ల వేగం పెరగనున్నట్లు అధికారులు తెలిపారు. ఈ సెక్షన్లలో స్వర్ణ చతుర్భుజి, స్వర్ణ వికర్ణ మార్గాలు ఉన్నాయి. ఈ మార్గాల్లో ట్రాక్ సామర్ధ్యాన్ని అంచనా వేసేందుకు అన్ని క్లాసులతో కూడిన 24 బోగీలు కలిగిన రైలును ట్రయల్​గా​ నడిపింది.

సెప్టీ కమిషనర్​కు నివేదిక..

వేగ పరీక్ష సహా వాటి సంబంధిత పనులు పూర్తయ్యక అన్ని మార్గాల్లో రైళ్ల వేగాన్ని గంటకు 130 కిలోమీటర్లు నడిపేందుకు వీలుగా రైల్వే సేఫ్టీ కమిషనర్​కు నివేదిక ఇస్తారు.

ముందే గమ్యస్థానాలకు..

ప్రధాన సెక్షన్లలో రైళ్ల వేగం పెంపు వల్ల ప్రయాణికులు మరింత సమయం ముందే గమ్య స్థానాలకు చేరతారని దక్షిణ మధ్య రైల్వే జనరల్ మేనేజర్ గజానన్ మాల్యా పేర్కొన్నారు. ఈ నేపథ్యంలో మరిన్ని ఎక్కువ సంఖ్యలో రైళ్లను నడపడం సాధ్యపడుతుందని యన వివరించారు. తద్వారా సరకు రవాణా రైళ్ల రాకపోకలకు ఎంతో ఉపయుక్తంగా ఉంటుందని తెలిపారు.

ఇవీ చూడండి : 'అమరావతి'పై వాదనలు.. రిట్ పిటిషన్ల విభజనకు హై కోర్టు ఆదేశం