మీసేవ, ఇంటర్నెట్ సెంటర్ల ద్వారా పలువురి ఆధార్ కార్డులు, ఫోన్ నెంబర్లను ఆన్లైన్లో రిజిష్టర్ చేసి సివిల్ కాంట్రాక్టర్లు అక్రమంగా ఇసుక ఉపయోగించుకున్న ఉదంతం.. కృష్ణా జిల్లాలో వెలుగుచూసింది. మైలవరం నియోజకవర్గంలోని రెడ్డిగూడెం, జీ. కొండూరు మండలాల్లో సుమారు 942 టన్నుల ఇసుక ఈ విధంగా పక్కదారి పట్టినట్లు స్పెషల్ ఎన్ఫోర్స్మెంట్ బ్యూరో విచారణలో తేలింది.
ఈ మేరకు ఆరుగురు వ్యక్తులపై కేసు నమోదు చేసి దర్యాప్తు చేస్తున్నట్లు నూజివీడు సబ్ డివిజన్ డీఎస్పీ శ్రీనివాసులు తెలిపారు. సివిల్ కాంట్రాక్టర్లు బల్క్ ఆర్డర్ల ద్వారా ఇసుక పొందాల్సి ఉన్నా... సామాన్యుల పేరుతో ఇసుక వాడుకోవడం చర్చనీయాంశమైంది. ఆన్లైన్లో ఇసుక దొరకని వారి ద్వారా ఈ విషయం వెలుగులోకి వచ్చింది. ఎస్పీ ఆదేశాలతో స్పెషల్ ఎన్ఫోర్స్మెంట్ బ్యూరో విచారణ జరిపి గుట్టు బయటపెట్టింది.