Avanigadda MRO office: కృష్ణా జిల్లా అవనిగడ్డ తహసీల్దార్ కార్యాలయం పరిస్థితి చాలా దారుణంగా ఉంది. వర్షం కురిస్తే ఆఫీసంతా జలమయమవుతుంది... మోకాళ్ల లోతు నీళ్లల్లోనే పనులు చేయాల్సిన దుస్థితి.. 1912వ సవత్సరంలో నిర్మించిన ఈ కార్యాలయం.. ఎప్పుడు కూలుతుందో తెలియడంలేదు. గత ప్రభుత్వం 90 లక్షలతో కొత్త భవన నిర్మాణం చేపట్టింది. గ్రౌండ్‌ప్లోర్ పూర్తైంది. ఇక మిగిలింది.. మొదటి అంతస్తులో ఫ్లోరింగ్, విద్యుత్ పనులు మాత్రమే. వాటినీ త్వరగా పూర్తి చేసి.. కార్యాలయ ప్రవేశం చేయాల్సిన అధికారులు ఇంకా ఈ పాడుబడ్డ పెంకుటింట్లోనే పనులు కానిస్తున్నారు.
వర్షం కురిస్తే చాలు.. కార్యాలయంలో రోజుల తరబడి నీరు నిలిచిపోతోంది. కొన్నిసార్లు సిబ్బంది కుర్చీల పక్కనే.. పెంకులు పడిన సందర్భాలున్నాయి. అవనిగడ్డ నియోజకవర్గంలోని ఆరు మండలాల అధికారులకు ఒకే ఒక్క సబ్-ట్రెజరీ కార్యాలయమూ..ఈ భవనంలోనే ఉంది. ఇక జనమైతే.. ఏదైనా పని కోసం వెళ్తే.. ప్రాణాలతో బయటపడతామా అని ప్రశ్నించుకునే పరిస్థితి. దాదాపు పూర్తైన కొత్త భవనంలో విధులు నిర్వర్తించడానికి సమస్య ఏంటని ప్రశ్నిస్తున్నారు.