'అన్న అమృతహస్తం... తల్లీబిడ్డల సంక్షేమం'

మాతాశిశు మరణాలు తగ్గించేందుకు దేశంలోని అనేక రాష్ట్రాలు అష్టకష్టాలు పడుతుంటే... మన ప్రభుత్వం ఈ సమస్యను అధిగమించే దిశలో ముందువరుసలో నిలిచింది. జిల్లాలవారీగా గణాంకాలు పరిశీలిస్తే... మాతాశిశు మరణాలు గణనీయంగా తగ్గాయి. తల్లీబిడ్డల్లో రక్తహీనత సమస్యను అధిగమించడంలో కృష్ణాజిల్లా ప్రథమ స్థానంలో నిలిచింది. జిల్లాలో గతేడాది లక్ష ప్రసవాల్లో 64 మంది తల్లులు మృతిచెందగా, ఈ ఏడాది ఆ సంఖ్య 40కి తగ్గింది. పుట్టిన ప్రతి వెయ్యిమందిలో 10 మంది నవజాత శిశువులు ఏడాదిలోపే మరణించగా... ఈ ఏడాది ఆ సంఖ్య ఏడుకు తగ్గింది. తల్లీబిడ్డల సంక్షేమం కోసం ప్రభుత్వం అమలు చేస్తున్న పథకాల ఫలితంగానే మరణాల సంఖ్య తగ్గిందని అధికారులు చెబుతున్నారు.

తన రక్తమాంసాలు పంచి... బిడ్డకు జన్మనిచ్చేందుకు ప్రతీతల్లి మరో జన్మఎత్తుతుంది. ఆ బిడ్డ సంపూర్ణ ఆరోగ్యంతో తన ఒడి చేరినప్పుడు అన్ని బాధలూ మరిచిపోయి ఆనందంతో పులకిస్తుంది. కానీ... బిడ్డ ఆరోగ్యం తల్లి ఆహారంపైనా... ఆమెకు అందే వైద్యం... ఆహారం మీదే ఆధారపడి ఉంటుంది. ప్రత్యేకించి నిరుపేద మహిళలు గర్భం దాల్చినపుడు తొమ్మిది నెలలు సరైన పౌష్టికారం అందక రక్తహీనత బారినపడి... ప్రసవ సమయంలో ప్రాణాపాయ పరిస్థితుల్లోకి వెళ్తుంటారు.

ఇలాంటి పరిస్థితిలో ప్రభుత్వ ఆస్పత్రుల్లో వైద్యం గురించి సందేహాలు... ప్రైవేటు ఆస్పత్రులకు వెళ్లాలంటే ఆర్థిక స్థోమత లేకపోవడం... ఇళ్ల వద్దే కాన్పు చేయించుకుని ప్రాణాలమీదకు తెచ్చుకున్నవారెందరో. ఇదంతా గతం.. ఇప్పుడు నిరుపేద మహిళలు గర్భం దాల్చినప్పటి నుంచి మొదలు... ఆసుపత్రిలో సుఖప్రసవం చేయించుకుని తల్లీబిడ్డలు సంపూర్ణ ఆరోగ్యంతో ఇంటికి చేరే వరకు చంద్రబాబు ప్రభుత్వమే భరోసా కల్పిస్తోంది. పలు పథకాల ద్వారా అనేక ప్రోత్సాహకాలు లభిస్తుండటంతో... గర్భిణులు సర్కారీ దవాఖానాల్లో సుఖప్రసవాలు చేయించుకునేందుకు ముందుకు వస్తున్నారు.

గర్భిణులు, బాలింతలు, చిన్నారుల్లో రక్తహీనత తగ్గించేందుకు ప్రభుత్వం అంగన్‌వాడీ కేంద్రాల్లో అన్న అమృతహస్తం, బాలసంజీవని పథకాల కింద పౌష్టికాహారాన్ని అందిస్తోంది. అన్న అమృతహస్తం కింద గర్భిణులకు ప్రతిరోజూ 100 మిల్లీలీటర్ల పాలు, గుడ్డు, ఆకుకూర, పప్పుతో భోజనం అందిస్తున్నారు. దీనికి అదనంగా జిల్లా అధికారులు ఐసీడీఎస్‌ ద్వారా నువ్వుల లడ్డు, సజ్జలడ్డు అందిస్తున్నారు. బాలసంజీవని కిట్లలో రాగి పిండి, సజ్జపిండి, జొన్నలు, పల్లీలు, చిక్కీలు తదితర హైప్రొటీన్‌ ఫుడ్‌ను అందిస్తున్నారు. ఫలితంగా రక్తహీనత సమస్య గణనీయంగా తగ్గింది.

అన్న అమృతహస్తం, బాల సంజీవని పథకాల ద్వారా సంపూర్ణ ఆరోగ్యంతో... ప్రభుత్వ ఆస్పత్రులకు వచ్చే గర్భిణులకు పైసా ఖర్చు లేకుండా వైద్యులు దగ్గరుండి సుఖప్రసవం చేయిస్తున్నారు. రాష్ట్ర వ్యాప్తంగా మాతాశిశు మరణాల సంఖ్య తగ్గించడంలో మొదటివరుసలో నిలిచామని అధికారులు ఆనందంగా చెబుతున్నారు.