ఓ మాతృమూర్తికి.. అంతిమ ఘడియల్లో రాకూడని కష్టం వచ్చింది. కడుపున పుట్టిన కుమారుడు.. విగతజీవిగా పడి ఉన్న అమ్మను అక్కరకు రాదనుకున్నాడు. ఆస్తి పంచివ్వలేదన్న అక్కసుతో.. అతి దారుణంగా ప్రవర్తించాడు. చనిపోయిన తన తల్లికి కనీసం అంత్యక్రియలు చేసేందుకూ.. అతనికి మనస్కరించలేదు. చివరికి ఆమె భౌతిక కాయాన్ని కూడా ఇంటికి రానివ్వకుండా.. వీధిపాలు చేశాడు. పోలీసులు జోక్యం చేసుకోగా.. మృతదేహాన్ని ఇంటివద్దకు అనుమతించినా.. అంత్యక్రియలకు మాత్రం ముందుకు రాలేదు.
అతడి కర్కశత్వాన్ని చూసి చలించిన.. ఖిద్మత్ స్వచ్ఛంద సంస్థ స్పందించింది. ఆ సంస్థ నిర్వాహకులకు హిందూ ఆచారాలు తెలియకపోయినా... అంతిమ సంస్కారాన్ని పూర్తి చేసేందుకు ముందుకు వచ్చింది. కడుపున పుట్టిన వాడే కాలదన్నిన వేళ.. అన్నీ తామై కడసారి ఘట్టాన్ని పూర్తి చేసింది. ఆ మాతృమూర్తి భౌతిక కాయాన్ని ఖననం చేసింది.
గుంటూరు జిల్లా మంగళగిరి ఇందిరానగర్కు చెందిన సత్యనారాయణ, ధనలక్షి దంపతులకు కుమారుడు నాగమల్లేశ్వరరావు, కుమార్తె అన్నపూర్ణ సంతానం. సత్యనారాయణ జనవరిలో మృతి చెందాడు. ఆదివారం రాత్రి తల్లి వృద్ధాప్య సమస్యలతో కన్నుమూసింది. తన తల్లి కరోనాతో చనిపోయందనే భయం ఉందని శవపంచనామా నివేదిక వచ్చేదాకా అంత్యక్రియలు నిర్వహించబోనని నాగమల్లేశ్వరరావు మొండికేశాడు. ఆమెది సాధారణ మృతే అని వైద్యులు ఇచ్చిన పత్రాన్ని పోలీసులు చూపించినా... అంత్యక్రియలకు అతను అంగీకరించలేదు.