రూ. 13 కోట్ల భవనం.. అలంకార ప్రాయం

దాదాపు 13 ఏళ్ల క్రితం భూ వివాదంతో ఆగిపోయిన బాలికల గురుకుల పాఠశాల భవన నిర్మాణం ఎట్టకేలకు పూర్తయింది. అయినప్పటికీ అక్కడ తరగతులు నిర్వహించట్లేదు. 370 మంది విద్యార్థినులు ఓ అద్దె భవనంలో.. ఇరుకు గదుల్లో ఉంటూ చదువుకుంటున్నారు. భవనాలు ఉన్నా కిరాయిలు కడుతూ అద్దె భవనాల్లో పాఠశాల ఎందుకు నడపాల్సి వచ్చింది. ఇంతకీ.. ఈ సమస్య ఎక్కడుంది? విద్యార్థులు పడుతున్న ఇబ్బందులేంటి?

గుంటూరు జిల్లా ప్రత్తిపాడు నియోజకవర్గంలోని కాకుమానులో 13 ఏళ్ల క్రితం గురుకుల బాలికల పాఠశాల మంజూరైంది. పాఠశాల నిర్మించేందుకు అధికారులు స్థలం కేటాయించారు. అయితే ఆ భూమి తమదంటే తమదని రెవెన్యూ, దేవాదాయ శాఖలు కోర్టుల్లో కేసులు వేశాయి. ఆ వివాదంతో పాఠశాల నిర్మాణం ఆగిపోయింది. అప్పటినుంచి పాఠశాలను బాపట్లలో నిర్వహిస్తున్నారు.

వివాదం పరిష్కారం.. భవనం నిర్మాణం

గత ప్రభుత్వంలో సాంఘిక, గిరిజన సంక్షేమశాఖ మంత్రిగా ఉన్న రావెల కిశోర్ బాబు 2 శాఖలతో మాట్లాడి భూ వివాదాన్ని పరిష్కరించారు. ఎస్సీ ఉపప్రణాళిక కింద రూ. 13 కోట్ల నిధులతో పాఠశాల నిర్మించేందుకు 2016 జులై 9న ఆయన శంకుస్థాపన చేశారు. ఆంధ్రప్రదేశ్ ఎడ్యుకేషన్ వెల్ఫేర్ డెవలప్​మెంట్ కార్పొరేషన్ వారు పాఠశాల నిర్మాణాన్ని చేపట్టారు. పాఠశాల, వసతి, బోజనశాల, ఉపాద్యాయులు ఉండేందుకు విశాలవంతమైన భవనాలు నిర్మించారు. 2019 ఫిబ్రవరి 14వ తేదీన అప్పటి మంత్రి నక్కా ఆనందబాబు పాఠశాల భవనాన్ని ప్రారంభించారు.

రాని నిధులు.. ఆగిన పనులు

అయితే అక్కడ తరగతుల నిర్వహణ మాత్రం జరగడం లేదు. పాఠశాల చుట్టూ ప్రహరీ నిర్మాణం, తాగునీరు, డ్రైనేజీ పైపులు, రోడ్డు నిర్మాణ పనులు చేయాల్సి ఉంది. ఈ పనులను ఏపీ పోలీస్ హౌసింగ్ కార్పొరేషన్ వారికి అప్పగించారు. ఈ పనులకు నిధులు మంజూరు కాకపోవడంతో రూ. 13 కోట్ల రూపాయల భవనం అలంకారంగా మారింది. బాపట్లలో పాఠశాల నిర్వహిస్తున్న అద్దె భవనానికి ప్రభుత్వం నెలకు రూ.41 వేలు అద్దె చెల్లిస్తుంది.

ఇవీ చదవండి: