'మన కష్టాలకు కేసీఆరే కారణం'

విభజన సమయంలో రాష్ట్రానికి అన్యాయం జరగడానికి తెలంగాణ సీఎం కేసీఆరే కారణమని... దిల్లీ నేతలతో కుమ్మక్కై హైదరాబాద్​ను తెలంగాణకు... అప్పులు... ఆంధ్రాకు వచ్చేలా చేశారని గుంటూరు ఎంపీ గల్లా జయదేవ్​ ఆరోపించారు.

రాష్ట్ర ప్రజలు కోలుకోకుండా చేసిన కేసీఆర్... సహకారం అందిస్తామని చెబితే ఎలా నమ్మాలని ఎంపీ గల్లా జయదేవ్ ప్రశ్నించారు. కేసీఆర్​ను నమ్మితే మోదీని నమ్మినట్లేనన్న గల్లా... రాష్ట్రానికి ఏ పరిశ్రమ ఇచ్చినా... తెలంగాణకు ఇవ్వాలని కొర్రీలు పెట్టిన విషయం గుర్తుచేశారు.

గుంటూరు జిల్లా ప్రత్తిపాడు మండలం తిక్కిరెడ్డిపాలెంలో తెదేపా శ్రేణులతో జరిగిన విస్తృతస్థాయి సమావేశంలో ఎంపీ మట్లాడారు. జగన్... మోదీ... కేసీఆర్ ఒక్కటై... హైదరాబాద్​లో ఉన్న పార్టీ నాయకులు... బంధువులపై దాడులు చేయిస్తున్నారని ఆరోపించారు. జగన్​ను అడ్డంపెట్టుకొని రాష్ట్రంపై అధికారం చలాయించాలని చూస్తున్నారని విమర్శించారు.

జగన్​కు ఓటేస్తే మోదీకి వేసినట్లేనన్న జయదేవ్... 25 మంది ఎంపీలను గెలిపిస్తే దిల్లీలో చక్రం తిప్పగలమని పేర్కొన్నారు. బడ్జెట్ సమావేశాల సమయంలో ఈడి నుంచి నోటీసులు పంపించారన్న ఎంపీ... 8 గంటలపాటు తనను విచారరించారని చెప్పారు. తన కుటుంబ సభ్యులపై దాడులకు ప్రయత్నిస్తున్నారని ఆరోపించారు. ఎవ్వరికీ భయపడమని స్పష్టం చేశారు. అందరికీ ఆమోదయోగ్యమైన వ్యక్తిని ఎమ్మెల్యే అభ్యర్థిగా ప్రకటిస్తారని ఉద్ఘాటించారు.