గుంటూరు రైతుల వినూత్న ఆలోచన.. వట్టివేర్ల సాగుతో అద్భుతాలు

vatti verlu Cultivation : పంట వేయాలంటే పొలమే ఉండాలా ? మొక్క పెరగాలంటే మట్టే కావాలా ? ఆ రెండూ అవసరం లేదని నిరూపిస్తున్నారు గుంటూరుకు చెందిన ఇద్దరు రైతులు. వ్యవసాయాన్ని అభిరుచిగా చేపట్టడమే కాదు కొత్తరకం పంటలు, సరికొత్తగా సాగు చేయటంపై దృష్టి సారించారు. మన రాష్ట్రంలో పెద్దగా సాగులో లేని వట్టివేర్లను పెంపకం మొదలుపెట్టారు. అదీ నేలపై కాకుండా ప్రత్యేకమైన పరిజ్ఞానంతో ప్రారంభించారు.

vatti verlu Cultivation : వట్టివేర్లు.. మనవద్ద చాలామందికి తెలియని పంట. ఉత్తరప్రదేశ్, పుదుచ్చేరి వంటి చోట్లే సాగవుతోంది. అలాంటి పంట సాగును గుంటూరు జిల్లాలో ఇద్దరు ప్రారంభించారు. ప్రైవేటు ఉద్యోగాలు, చిన్న చిన్న వ్యాపారాలు చేసిన శివరాంప్రసాద్, సాయిప్రసాద్‌లు ఏదైనా కొత్త పంట సాగు చేయాలని భావించారు. సాయిప్రసాద్ కు నూనెల తయారీలో అనుభవం ఉండటంతో యూపీ, పుదుచ్చేరిలో ఎక్కువగా పండించే వట్టివేర్లను సాగు చేయాలని నిర్ణయించారు. నరసరావుపేట సమీపంలోని కేసానుపల్లి వద్ద ఎకరా పొలంలో వట్టి వేర్లు వేశారు. పంట బాగానే వచ్చినప్పటికీ.... నల్లరేగడి భూముల్లో వేర్లను బయటకు తీయటం ఇబ్బందిగా మారింది.జేసీబీలు ఉపయోగించి వేర్లు తీయటానికి ఎకరాకు 40వేలు ఖర్చయింది. అది కూడా వేర్లు పూర్తిగా సేకరించలేని పరిస్థితి. దీంతో ఈ సమస్యను అధిగమించేందుకు టవర్ సాంకేతికత వైపు మళ్లారు.

టవర్‌ సాంకేతికత
టవర్‌ సాంకేతికతలో భాగంగా మొక్కలను పశువుల నుంచి కాపాడే ట్రీగార్డులను తీసుకున్నారు. దాని లోపల మల్చింగ్ షీట్ వేశారు. అప్పుడు నిలువుగా ఉండే డబ్బా ఆకారంలోకి వచ్చింది. అందులో కొబ్బరిపీచు, కాఫీ పొడి వ్యర్థాలు, కోళ్లఫారం వ్యర్థాలు, వర్మి కంపోస్టు మిశ్రమంతో నింపారు. టవర్ పై భాగంతో పాటు..చుట్టూ కూడా వట్టివేర్ల మొక్కలు నాటారు. ట్రీగార్డ్ ని చుట్టేందుకు వాడిన తీగలు తీస్తేచాలు మొక్కలు వేర్లతో సహా బయటకు వస్తాయి. వాటిని శుభ్రం చేయటం, వట్టివేర్లు సేకరించటం చాలా సులభతరమైందని సాగుదారులు చెబుతున్నారు.

మిగతా పంటల సాగుపై దృష్టి..
ప్రస్తుతం ఎకరా పొలంలో 200 వట్టివేర్ల టవర్లు ఏర్పాటు చేశారు. తెగుళ్లు, కలుపు వంటి సమస్యలు లేవు. ఎకరా పొలంలో ఒకటిన్నర టన్ను దిగుబడి వస్తుందని అంచనా వేస్తున్నారు. ప్రస్తుతం 4 అడుగుల టవర్లు ఏర్పాటు చేసి డ్రిప్ విధానంలో నీరు అందిస్తున్నారు. సాగు కోసం సేంద్రీయ ఎరువులను మాత్రమే వాడుతున్నారు. టన్ను వేర్లతో 12 నుంచి 15 లీటర్ల నూనె తీయవచ్చు. ఈ పంట పూర్తవటానికి 9నుంచి 12 నెలల సమయం పడుతుంది. ఈ వేర్ల నుంచి నూనె తీసి సుగంధ ద్రవ్యాలు, ఆయుర్వేదంలో వినియోగిస్తారు. వట్టివేర్లతో పాటు తులసి మొక్కల సాగును ఇదే విధానంలో ప్రారంభించారు. మిగతా పంటలు సాగు చేయటంపై దృష్టి పెట్టామని రైతులంటున్నారు.

ఇదీ చదవండి