TDP leaders on Delhi liquor scam: విజయసాయిరెడ్డి, జగన్ రెడ్డి కనుసన్నల్లోనే రాష్ట్రంలో మద్యం వ్యాపారం జరుగుతోందని పర్చూరు ఎమ్మెల్యే ఏలూరి సాంబశివరావు ఆరోపించారు. వారికి సంబంధించిన కంపెనీల కల్తీ బ్రాండులను ప్రజలకు అమ్ముతున్నారని మండిపడ్డారు. ప్రజల ప్రాణాలతో చెలగాటమాడుతున్నారని ధ్వజమెత్తారు. అరబిందో కెమ్ ఫార్మా, ట్రైడెంట్ లైఫ్ సైన్సెన్కు సీఎఫ్వోగా ఉన్న వ్యక్తి శ్రీనివాస్ కాశిచాయానుల.. అదాన్ డిస్టిలరీస్ పేరుతో శరత్ చంద్రారెడ్డి ఏపీలో మద్యం వ్యాపారం చేస్తున్నారని తెలిపారు. శరత్ చంద్రారెడ్డి దగ్గర పనిచేసే చిరుద్యోగుల పేరుతో షెల్ కంపెనీలు నడుపుతున్నారని ఆగ్రహం వ్యక్తం చేశారు. దీని వెనుక ప్రభుత్వ పెద్దలున్నారనే విషయం తేటతెల్లమవుతోందన్నారు.
"జగన్, విజయసాయి కనుసన్నల్లో మద్యం వ్యాపారం సాగుతోంది. కల్తీ మద్యం అమ్ముతూ ప్రజల ప్రాణాలతో చెలగాటం ఆడుతున్నారు. రాష్ట్రంలో అదాన్ డిస్టిలరీస్ పేరుతో శరత్ చంద్రారెడ్డి మద్యం వ్యాపారం చేస్తున్నారు. శరత్ వద్ద పనిచేసే చిరుద్యోగుల పేరుతో షెల్ కంపెనీల నిర్వహిస్తున్నారు. ప్రభుత్వం అమ్మే మద్యం.. అదాన్ డిస్టిలరీస్ నుంచే వస్తోంది. కల్తీ మద్యం అమ్మి ప్రభుత్వం రూ.24వేల కోట్లు దండుకుంది. కల్తీ మద్యానికి సంబంధించి మా వద్ద ఆధారాలున్నాయి. కల్తీ మద్యం వ్యాపారంపై ఈడీ, సీబీఐ విచారణ చేపట్టాలి." -ఏలూరి సాంబశివరావు