‘హలో.. నేను ఇంటెలిజెన్స్‌ డీఎస్పీని మాట్లాడుతున్నా.. మీ ఎడ్లకు విషమిచ్చి హత్య చేసిన కేసును నేనే చూస్తున్నా.. నేను చెప్పినట్లు చేస్తే రూ. 45 లక్షలు బీమా సొమ్ము పరిహారంగా వస్తుంది’.. ఆ మాటలు వినగానే పుట్టెడు వేదనతో ఉన్న రైతుకు ఏదో ఊతం దొరికినట్లయింది. అవతలి వ్యక్తి రెండుసార్లు ఫోన్‌చేసి మాయమాటలు చెప్పి భరోసా ఇచ్చేసరికి అమాంతం నమ్మేశాడు.. నాకో రూ.5 లక్షలు ఇస్తే పనైపోద్ధి. విషయం మాత్రం మూడో వ్యక్తికి తెలియకూడదని మాట తీసుకున్నాడు.. అంతే.. ఏదో న్యాయం జరుగుతుంది కదా.. అనే ఆశ కొద్దీ ఆ రైతు అతడు చెప్పినట్లే చేశాడు. తీరా కొద్దిరోజులు పోయాక అసలు విషయం తెలిసింది. ప్రాణసమానమైన ఎడ్లు కోల్పోయి.. పీకల్లోతు వేదనతో ఉన్న తాను మరింత నష్టపోయానని గుర్తించి ఎట్టకేలకు బుధవారం పోలీసులకు ఫిర్యాదు చేశాడు.
తూర్పు గోదావరి జిల్లా సామర్లకోటలోని పెద్దనుయ్యి వీధికి చెందిన వల్లూరి సత్యేంద్రకుమార్‌కు చెందిన పందెపు రెండు జతల ఎడ్లు జనవరి 29న ఆకస్మికంగా మృతిచెందాయి. గుర్తుతెలియని వ్యక్తులు విషమిచ్చి చంపేశారని అతడు అనుమానం వ్యక్తం చేయడంతో సామర్లకోట పోలీసులు దర్యాప్తు చేస్తున్నారు. ఈ క్రమంలో ఈ నెల 2న బాధిత రైతు సత్యేంద్రకుమార్‌కు ఓ వ్యక్తి ఫోన్‌చేసి ఇంటెలిజెన్స్‌ డీఎస్పీగా పరిచయం చేసుకున్నాడు. చనిపోయిన ఎడ్లకు రూ. 45 లక్షలు బీమా వస్తుందని నమ్మించాడు. తన వంతు సొమ్ము బ్యాంకు ఖాతాలో జమచేస్తే సరిపోతుందని ఎస్‌బీఐ, సిటీ యూనియన్‌ బ్యాంకులకు చెందిన రెండు ఖాతాల నంబర్లు ఇచ్చాడు. ఈ నెల 3 నుంచి 6వ తేదీ మధ్య ఆ ఖాతాలకు 13 విడతల్లో రూ.4.99 లక్షలు జమ చేశాడు. అనంతరం ఆ వ్యక్తి జాడలేకపోవడంతో స్నేహితుల వద్ద గోడు వెల్లబుచ్చుకోవడంతో అసలు విషయం చుట్టూ తిరిగి పోలీసుల వరకు వెళ్లింది. బాధిత రైతు ఫిర్యాదు మేరకు కేసు నమోదుచేసి దర్యాప్తు చేస్తున్నట్లు సామర్లకోట ఎస్సై సుమంత్‌ చెప్పారు.