రాష్ట్రవ్యాప్తంగా పరిషత్ ఎన్నికల ఓట్ల లెక్కింపు కొనసాగుతోంది. మొత్తం 206 కేంద్రాల్లో ఓట్ల లెక్కింపు చేపట్టగా.. ఇప్పటివరకూ వెలువడిన ఫలితాల్లో అధికార వైకాపా హవా కొనసాగింది. శ్రీకాకుళం జిల్లాలో మొత్తం 678 ఎంపీటీసీ స్థానాలు ఉండగా.. 66 స్థానాలు ఏకగ్రీవమయ్యాయి. 590 ఎంపీటీసీ స్థానాలకు ఎన్నికలు జరగ్గా.. ఇప్పటివరకూ వెల్లడైన ఫలితాల్లో వైకాపా 376, తెలుగుదేశం 49, స్వతంత్రులు 4 స్థానాల్లో గెలిచారు. విజయనగరం జిల్లాలో 549 ఎంపీటీసీ స్థానాల్లో 55 ఏకగ్రీవం కాగా, 487 స్థానాలకు ఎన్నికలు నిర్వహించారు. ఇప్పటివరకు వెల్లడైన ఫలితాల ప్రకారం.. వైకాపా 389, తెలుగుదేశం 86చోట్ల గెలుపొందాయి. విశాఖ జిల్లాలో 652 ఎంపీటీసీ స్థానాలు ఉండగా 37 ఏకగ్రీవమయ్యాయి. మిగతా 612 స్థానాలకు ఎన్నికలు జరగ్గా.. ఇప్పటివరకు వైకాపా 337, తెలుగుదేశం 82, భాజపా 4, స్వతంత్రులు 20 స్థానాల్లో విజయం సాధించారు.
తూర్పుగోదావరి జిల్లాలో 1086 ఎంపీటీసీ స్థానాలు ఉండగా 82 ఏకగ్రీవమయ్యాయి. 999 చోట్ల ఎన్నికలు జరగ్గా.. ఇప్పటివరకూ వైకాపా 120, తెలుగుదేశం 30, జనసేన16 స్థానాలు గెలుచుకున్నాయి. పశ్చిమగోదావరి జిల్లాలో 863 ఎంపీటీసీ స్థానాలు ఉండగా..73 ఏకగ్రీవమయ్యాయి. 9 స్థానాల్లో ఎన్నికలు జరగలేదు. 13 స్థానాలు మున్సిపాలిటీల్లో విలీనమయ్యాయి. 781 చోట్ల ఎన్నికలు జరగ్గా వైకాపా 550, తెలుగుదేశం 84, జనసేన 51, భాజపా 3, స్వతంత్రులు పది స్థానాలు కైవసం చేసుకున్నారు.
కృష్ణా జిల్లాలో మొత్తం 812 ఎంపీటీసీ స్థానాలు ఉండగా 69 స్థానాలు ఏకగ్రీవమయ్యాయి. 648 స్థానాలకు ఎన్నికలు జరగ్గా, ఇప్పటివరకూ వైకాపా 568, తెలుగుదేశం 63, జనసేన 9, బీఎస్పీ 2 స్థానాల్లో గెలుపొందాయి. గుంటూరు జిల్లాలో 862 ఎంపీటీసీ స్థానాలకు.. 226 ఎకగ్రీవమయ్యాయి. 571 స్థానాల్లోఎన్నికలు జరగ్గా, వైకాపా 485.., తెలుగుదేశం 54, జనసేన10 స్థానాల్లో గెలుపొందాయి. ప్రకాశం జిల్లాలో మొత్తం 742 ఎంపీటీసీలు ఉండగా.. 374 స్థానాలు ఏకగ్రీవమయ్యాయి. మిగిలిన 368 స్థానాల్లో.. 274 చోట్ల వైకాపా,. 22 స్థానాల్లో తెలుగుదేశం విజయం సాధించాయి. ఒకచోట కౌంటింగ్ నిలిపివేశారు. నెల్లూరు జిల్లాలో 554 ఎంపీటీసీ స్థానాలు ఉండగా.. 188 ఎకగ్రీవమయ్యాయి. మిగిలిన 362 స్థానాలకు ఎన్నికలు జరగ్గా.. ఇప్పటివరకూ వైకాపా 292.., తెలుగుదేశం అభ్యర్థులు 27 చోట్ల గెలుపొందారు. భాజపా 2, సీపీఎం 2, జనసేన ఒకటి, ఇండిపెండెంట్లు 12 చోట్ల గెలుపొందారు.
సీమ జిల్లాల్లో వైకాపానే..
కర్నూలు జిల్లాలో 807 ఎంపీటీసీ స్థానాలు ఉండగా.. 312 ఏకగ్రీవం అయ్యాయి. 11 స్థానాల్లో ఎన్నికలు జరగలేదు. మిగిలిన 484 స్థానాల్లో ఎన్నికల జరగ్గా వైకాపా 406, తెలుగుదేశం 62 భాజపా3, CPI 2, స్వతంత్రులు 11చోట్ల గెలుపొందారు. కడప జిల్లాలో 554 ఎంపీటీసీ స్థానాలుండగా... 432 ఏకగ్రీవమయ్యాయి. 117 స్థానాలకు ఎన్నికలు జరగ్గా.. వైకాపా 84, తెలుగుదేశం 10, భాజపా 4 స్థానాల్లో గెలిచాయి. చిత్తూరు జిల్లాలో 886 ఎంపీటీసీ స్థానాలకు.. 433 ఏకగ్రీవమయ్యాయి. 419 స్థానాలకు ఎన్నికలు జరగ్గా.. ఇప్పటి వరకూ 389 చోట్ల వైకాపా, 25 స్థానాల్లో.. తెలుగుదేశం అభ్యర్థులు గెలుపొందారు. అనంతపురం జిల్లాలో 841 స్థానాలుండగా..50 ఏకగ్రీవమయ్యాయి. 10 చోట్ల అభ్యర్థులు చనిపోయారు. 781 స్థానాల్లో ఎన్నికలు జరగ్గా... ఇప్పటి వరకూ వైకాపా 694, తెలుగుదేశం 47, కాంగ్రెస్, భాజపా, సీపీఎం, సీపీఐ, జనసేన ఒక్కో చోట గెలిచాయి. 13 చోట్ల స్వతంత్రులు విజయం సాధించారు.
జడ్పీటీసీ ఫలితాలు ఇలా...
జడ్పీటీసీ ఎన్నికల ఫలితాల్లోనూ.. అన్నిచోట్ల వైకాపా ఆధిక్యంలో కొనసాగుతోంది. అర్థరాత్రి దాటినా లెక్కింపు పూర్తి చేసి విజేతలను ప్రకటిస్తామని.. రాష్ట్ర ఎన్నికల సంఘం స్పష్టం చేసింది. శ్రీకాకుళం జిల్లాలో మొత్తం 38 ZPTC స్థానాలకు.. 37 చోట్ల ఎన్నికలు జరిగాయి.ఇప్పటివరకు 24 జడ్పీటీసీల్లో వైకాపా విజయం సాధించింది. విజయనగరం జిల్లాలో 34 స్థానాలుండగా... అందులో 3 ఏకగ్రీవం అయ్యాయి. మిగిలిన 31 స్థానాలకు ఎన్నికలు జరగ్గా..అన్ని స్థానాలనూ వైకాపా కైవసం చేసుకుంది. విశాఖ జిల్లాలో 39 జడ్పీటీసీలకు గానూ రోలుగుంట స్థానం ఏకగ్రీవం అయింది. ఆనందపురంలో తెలుగుదేశం అభ్యర్థి మృతితో ఎన్నిక వాయిదాపడింది. మిగిలిన 37 స్థానాలకు ఎన్నికలు నిర్వహించగా..వాటి లెక్కింపు కొనసాగుతోంది. తూర్పుగోదావరి జిల్లాలో 61 స్థానాలకు.. ఎన్నికలు జరగ్గా, ఇప్పటివరకు 3 చోట్ల వైకాపా అభ్యర్థులు గెలుపొందారు. పశ్చిమ గోదావరి జిల్లాలో మొత్తం 48 జడ్పీటీసీ స్థానాలుండగా.. రెండు స్థానాలు ఏకగ్రీవమయ్యాయి. ఒక స్థానంలో ఎన్నికలు ఆగిపోయాయి. ఎన్నికలు జరిగిన 45స్థానాల్లో.. 7 చోట్ల వైకాపా అభ్యర్థులు గెలుపొందగా మిగిలిన స్థానాల్లో లెక్కింపు కొనసాగుతోంది.
కృష్ణా జిల్లాలో మొత్తం 49 జడ్పీటీసీ స్థానాలకు రెండు ఏకగ్రీవం అయ్యాయి. వివిధ కారణాలతో.. 2 చోట్ల ఎన్నికలు వాయిదాపడ్డాయి. 41 స్థానాల్లో ఎన్నికలు జరగ్గా.. 40 జడ్పీటీసీలను వైకాపా కైవసం చేసుకుంది. ఒకచోట తెలుగుదేశం గెల్చింది. గుంటూరు జిల్లాలో మొత్తం 57 జడ్పీటీసీలు ఉండగా.. 54 చోట్ల పోలింగ్ కు నోటిఫికేషన్ జారీచేశారు. వాటిలో 8 ఏకగ్రీవం కాగా.. మిగతా స్థానాలకు నిర్వహించిన ఎన్నికల్లో ఇప్పటివరకూ 40 చోట్ల వైకాపా విజయం సాధించింది. ప్రకాశం జిల్లాలో మొత్తం 56 స్థానాలుండగా.. 14 చోట్ల ఏకగ్రీవం అయ్యాయి. ఎన్నికలు జరిగిన 41 స్థానాల్లో 20 చోట్ల వైకాపా అభ్యర్థులు గెలుపొందగా.. మిగిలిన స్థానాల్లో లెక్కింపు కొనసాగుతోంది. నెల్లూరు జిల్లాలో మొత్తం 46 జడ్పీటీసీ స్థానాలుండగా.. 12 ఏకగ్రీవం అయ్యాయి. ఎన్నికలు జరిగిన 34 స్థానాల్లో.. ఇప్పటివరకూ 24 జడ్పీటీసీలను వైకాపా కైవసం చేసుకుంది.