రాజధాని నిర్మాణంపై వాడీ వేడి చర్చ
శాసనసభలో రాజధాని నిర్మాణంపై చర్చ జరిగింది. రాజధాని పనులు ఎక్కడికి వచ్చాయని.. కేవలం 500 కోట్ల బడ్జెట్తో నిర్మాణ పనులు ఎలా చేస్తారని మద్దాల గిరిధర్రావు అడిగిన ప్రశ్నకు మంత్రి బొత్స సత్యనారాయణ సమాధానమిచ్చారు. రాజధాని నిర్మాణంలోని అవకతవకలు, అవినీతిపై కమిటీ వేశామని నివేదిక వచ్చిన తర్వాత పనులు ప్రారంభిస్తామని తెలిపారు. సీఆర్డీఏకు రాజధాని పేరిట గత ప్రభుత్వం ఐదేళ్లలో రూ. 1105 కోట్లు మాత్రమే ఇచ్చిందని... ఒక్క ఏడాదిలో రూ.500 కోట్లు ఇచ్చారని తెలిపారు.
అవినీతి సాకుతో రాజధాని నిర్మాణాన్ని నిర్లక్ష్యం చేస్తున్నారని... త్వరితగతిన పనులు జరపాలని మద్దాల గిరిధర్రావు కోరారు. పనులెప్పుడు ప్రారంభమవుతాయో స్పష్టంగా తెలపాలని అన్నారు. రాజధానిపై వైకాపా ప్రభుత్వం చిత్తశుద్ధితో ఉందని రాష్ట్ర ప్రజలు గర్వపడేలా నిర్మాణాలు చేస్తామని బొత్స అన్నారు.