మోటార్ల చోరీ కేసులో తనను ఇరికించారని.. పోలీసులతోపాటు అధికార పార్టీ మండల నాయకుడు, మరికొందరు వ్యక్తులు బెదిరించడంతో మనస్తాపం చెందిన మరుప్రోలు వీరాస్వామిరెడ్డి (37), భార్య వెంకటరమణ (34), కుమార్తె పోలేరమ్మ (10)తో కలిసి విషం తీసుకొని ఆత్మహత్యకు పాల్పడ్డాడు. మృతుడి కుటుంబసభ్యులు, పోలీసుల కథనం ప్రకారం.. బసివిరెడ్డిపాలేనికి చెందిన రైతు శివనాగిరెడ్డి తన పొలంలో మోటార్లు పోయాయని బాపట్ల గ్రామీణ పోలీసులకు ఈ నెల 16న ఫిర్యాదు చేశాడు. గ్రామానికి చెందిన వీరాస్వామిరెడ్డి, అతని బంధువు దొడ్ల అంకిరెడ్డిపై అనుమానంతో ఎస్సై కిరణ్‌ వారిని పోలీస్‌స్టేషన్‌కు పిలిచి విచారించారు. వారిద్దర్నీ తొమ్మిది రోజులుగా ఉదయం 9 నుంచి రాత్రి 7 గంటల వరకూ స్టేషన్‌లోనే ఉంచి పంపిస్తున్నారు. పోలీసులు ఆదివారం మరుప్రోలువారిపాలెం వెళ్లి పెద్దల సమక్షంలో వారిని విచారించారు. ఆ సమయంలో అధికార పార్టీ మండల నాయకుడొకరు కలగజేసుకున్నారు. అనుమానితులను పోలీసులు దుస్తులు విప్పదీసి కొడితేనే నిజం చెబుతారని, జైల్లో వేసినా విడిపించటానికి ఎవరూ రారంటూ బెదిరింపులకు దిగారు. సోమవారం మరోసారి స్టేషన్‌కు వెళ్లాల్సి ఉండగా ఉదయం వీరాస్వామి భార్య, కుమార్తెతో కలిసి విషం తాగాడు. బంధువులు ఆసుపత్రికి తరలిస్తుండగా ముగ్గురూ చనిపోయారు. దీనిపై కేసు నమోదు చేసి దర్యాప్తు ప్రారంభించినట్లు డీఎస్పీ శ్రీనివాసరావు తెలిపారు. తప్పుడు కేసు పెట్టి తన కుమారుడి కుటుంబాన్ని బలి తీసుకొన్నారని వీరాస్వామిరెడ్డి తండ్రి శేషిరెడ్డి కన్నీరుమున్నీరయ్యారు.
లేఖలో ఏముందంటే..
‘గ్రామంలో అపహరణకు గురైన మోటార్లన్నీ నేనే దొంగిలించానంటున్నారు. నేనే తప్పూ చేయలేదు. కొంతమంది పోలీసుల ద్వారా వేధిస్తూ బలవంతంగా ఒప్పించేందుకు ప్రయత్నిస్తున్నారు. 17వ తేదీ నుంచి స్టేషన్‌ చుట్టూ తిరుగుతున్నాం. మా కుటుంబానికి, మాతో ఉన్నవారికి న్యాయం చేయాలని వేడుకొంటున్నా’ అని వీరాస్వామిరెడ్డి ఆత్మహత్యకు ముందు లేఖ రాశాడని బంధువులు మీడియాకు అందజేశారు.