విశాఖపట్నం జిల్లా గాజువాకలో ప్రేమోన్మాది ఉన్మాదానికి బలైన యువతి ఘటనను సీరియస్గా తీసుకోవాలని ముఖ్యమంత్రి వైఎస్ జగన్ అధికారులను ఆదేశించారు. ఘటనపై సీఎస్, డీజీపీ, ఇంటలిజెన్స్‌ చీఫ్‌ నుంచి వివరాలు తెలుసుకున్న సీఎం.... యువతి కుటుంబానికి రూ.10 లక్షల ఆర్థిక సహాయం చేయాలని ఆదేశాలు జారీ చేశారు. ఘటనకు బాధ్యులైన వారిపై కఠిన చర్యలు తీసుకోవాలని సీఎం ఆదేశించారు.
యువతి కుటుంబాన్ని పరామర్శించాలని హోం మంత్రి మేకతోటి సుచరిత, దిశ ప్రత్యేక అధికారులు కృతికాశుక్లా, దీపికా పాటిల్‌కు సూచించారు. ప్రతి టీనేజ్‌ బాలిక మొదలు... ప్రతి మహిళ వరకు దిశ యాప్‌ డౌన్‌లోడ్‌ చేసుకుని ఉపయోగించుకునేలా అవగాహన కల్పించాలని అధికారులకు ముఖ్యమంత్రి సూచించారు. ప్రత్యేకించి పాఠశాలల్లో చదువుతున్న బాలికలు నుంచి కళాశాల విద్యార్థినుల వరకు వందకు వంద శాతం ఈ యాప్‌ డౌన్‌లోడ్‌ చేసుకుని ఉపయోగించేలా చర్యలు తీసుకోవాలన్నారు.