TDP PRESIDENT CHANDRABABU NAIDU : రుణాలు, విత్తనాలు, ఎరువుల కోసం రాష్ట్రంలో నిత్యం ఏదో ఒక చోట రైతులు ఆందోళనలు చేయాల్సిన దుస్థితి నెలకొందని తెలుగుదేశం పార్టీ అధినేత చంద్రబాబు ఆగ్రహం వ్యక్తంచేశారు. ప్రభుత్వ సహాయం, పంటలకు కనీస మద్ధతు ధర లేక వ్యవసాయ రంగం సంక్షోభంలో ఉందని ఆవేదన చెందారు. జాతీయ రైతు దినోత్సవం సందర్భంగా.. అన్నదాతలకు చంద్రబాబు శుభాకాంక్షలు తెలిపారు. రైతు సంతోషంగా ఉన్నప్పుడే రాష్ట్రం, దేశం సుభిక్షంగా ఉంటుందన్నారు.
కౌలు రైతుల సంక్షేమం మరిచారు..
రాష్ట్రంలో 93 శాతం మంది రైతులు అప్పుల్లో మునిగిపోయారని చంద్రబాబు చెప్పారు. రుణభారంలో రాష్ట్రాన్ని దేశంలో మొదటి స్థానానికి తీసుకువచ్చారని వైకాపా పాలనపై ధ్వజమెత్తారు. కౌలు రైతుల ఆత్మహత్యల్లో రెండో స్థానంలో, రైతుల ఆత్మహత్యల్లో మూడో స్థానంలో రాష్ట్రం నిలిచిందని ఆవేదన వ్యక్తం చేశారు. తెదేపా హయాంలో అమలుచేసిన రైతు రుణమాఫీని వైకాపా సర్కార్ రద్దు చేసిందని చంద్రబాబు మండిపడ్డారు. కౌలు రైతుల సంక్షేమాన్ని విస్మరించారన్న చంద్రబాబు... కనీస మద్ధతు ధరకు వ్యవసాయ ఉత్పత్తులను కొనుగోలు చేసి రైతులను ఆదుకోవాలని డిమాండ్‌ చేశారు.