పంట నష్టపోయిన రైతులకు హెక్టార్కు 30 వేలు, ఉద్యాన పంటలకు 50వేల రూపాయల చొప్పున పరిహారం చెల్లించాలని నారా లోకేశ్ డిమాండ్ చేశారు. పార్టీ కేంద్ర కార్యాలయం ఎన్టీఆర్ భవన్లో పార్లమెంట్ నియోజకవర్గాల వారీగా తెలుగు రైతు అధ్యక్షులు, కార్యదర్శులతో లోకేశ్ సమావేశం నిర్వహించారు. ఇటీవలే పదవులు పొందిన వీరు లోకేశ్ సమక్షంలో ప్రమాణ స్వీకారం చేశారు. రాష్ట్రంలో రైతు రాజ్యం తీసుకొస్తానన్న జగన్ రైతులేని రాజ్యం చేస్తున్న ద్రోహిగా మిగిలారని లోకేశ్ ధ్వజమెత్తారు.
అసెంబ్లీలో అసత్యాలు..
వైకాపా విధానాలతో ఏడాదిన్నరలో 496 మంది ఆత్మహత్య చేసుకున్నారని లోకేశ్ ఆరోపించారు. ఎలాంటి ముందస్తు హెచ్చరికలు చేయకపోవటం వల్లే నివర్ తుపాన్లో తీవ్ర నష్టం వాటిల్లిందని విమర్శించారు. పంటల బీమా కట్టకుండా అసెంబ్లీలో అసత్యాలు చెప్పి అడ్డంగా దొరికిపోయారని దుయ్యబట్టారు. ముందుగా ప్రీమియం చెల్లించి ఉంటే రైతులకు 4 వేల కోట్ల రూపాయల పరిహారం లభించేదన్నారు. 3వేల కోట్ల రూపాయలతో ధరల స్థిరీకరణ నిధి అని గొప్పులు చెప్పి 524 కోట్లు మాత్రమే ఖర్చు చేశారని ఆక్షేపించారు.