విద్యుత్ బ్యాటరీతో నడిచే బౌన్స్ ద్విచక్ర వాహనాలను మంత్రి పేర్నినాని ప్రారభించారు. విజయవాడ నగరంలో ఓ హోటల్ లో బౌన్స్ ప్రతినిధులు ఏర్పాటు చేసిన కార్యక్రమానికి ముఖ్య అతిథిగా హాజరైన పేర్నినాని ఈ విద్యుత్ వాహనాలను ఆవిష్కరించారు. ఎమ్మెల్యే మల్లాది విష్ణుని ద్విచక్రవాహనంపై ఎక్కించుకొన్న మంత్రి.. నగరంలో కాసేపు సంచరించారు.
పర్యావరణ హితంగా ఉండేందుకే ఈ విద్యుత్ వాహనాలను తెచ్చామన్న బౌన్స్ సంస్థ ప్రతినిధులు.. మెుదటగా బెంగళూరు, విజయవాడలోనే ప్రారంభించామని చెప్పారు. చాలా తక్కువ రుసుములు వసూలు చేస్తూ ఈ వాహనాలను వినియోగదారులకు అందిస్తున్నామని తెలిపారు. పర్యావరణాన్ని కాపాడేందుకు విద్యుత్ ఆధారిత వాహనాలను తెచ్చామని పేర్కొన్నారు. ప్రస్తుతం విజయవాడలో 600 బౌన్స్ విద్యుత్ వాహనాలు తిరుగుతున్నాయని సంస్థ ప్రతినిధులు తెలిపారు. నగరంలో తమ విద్యుత్ వాహనాలకు డిమాండ్ పెరిగిందని సంతోషం వ్యక్తం చేశారు.