దర్జాగా వచ్చాడు... బుల్లెట్ దోచుకెళ్లాడు!

సెల్​ఫోన్​లో మాట్లాడుతూ సొంత యజమాని వలే బైక్ వద్దకు చేరుకున్నాడు. అటూ ఇటూ చూసి లాక్​ ఓపెన్ చేశాడు. ఇంకేముంది దర్జాగా బైక్​ తీసుకుని వెళ్లిపోయాడు. విజయవాడలో ఓ దొంగ నిర్వాకం ఇదీ. సీసీ కెమెరాల్లో ఈ వ్యవహారమంతా రికార్డైంది.

ఒకేరోజు కొద్దిసమయం తేడాతో ఓ దొంగ రెండు ద్విచక్ర వాహనాలు చోరీ చేశాడు. వివరాల్లోకి వెళితే... విజయవాడకు చెందిన శంకరరావు మినర్వా హోటల్ వద్ద బుల్లెట్ వాహనాన్ని పార్కింగ్ చేశారు. కొద్దిసేపటి తర్వాత వచ్చి చూస్తే వాహనం మాయమైంది. సీసీ కెమెరాలను పరిశీలించగా ఓ వ్యక్తి ఎంచక్కా వాహనంతో దర్జాగా వెళ్లిపోయాడు. బాధితుడు మాచవరం పోలీసులకు ఫిర్యాదు చేశారు. పోలీసులు కేసు దర్యాప్తు చేస్తున్నారు. నిందితుడు మరో ప్రదేశంలో సైతం బైక్ దొంగిలించాడని పోలీసులు గుర్తించారు.