RRR On Amaravati: రాజధానిని మార్చడం ఎవరివల్లా కాదు: రఘురామ

MP Raghurama On Amaravati: ప్రజా భాగస్వామ్యంతో నిర్మించిన అమరావతిని నాశనం చేయడం దుర్మార్గమని నరసాపురం ఎంపీ రఘురామ కృష్ణరాజు మండిపడ్డారు. న్యాయస్థానం అండ రైతులకు ఉందన్న ఆయన.. రాజధాని అమరావతిని మార్చటం ఎవరి తరమూ కాదని అన్నారు.

MP Raghurama On Amaravati: రాజధాని అమరావతిని మార్చడం ఎవరివల్లా కాదని వైకాపా రెబల్ ఎంపీ రఘురామ కృష్ణరాజు ఉన్నారు. అమరావతి రైతుల న్యాయస్థానం-దేవస్థానం పాదయాత్ర ముగింపు సందర్భంగా తిరుపతిలో ఏర్పాటు చేసిన 'అమరావతి పరిరక్షణ మహోద్యమ సభ'లో ఆయన పాల్గొన్నారు.

రాజధానికి భూములిచ్చిన రైతుల త్యాగం వెలకట్టలేనిదని.. కొంతకాలం ఓపిక పడితే అమరావతే ఏకైక రాజధానిగా ఉంటుందన్నారు. పాదయాత్ర చేసిన మహిళల త్యాగానికి ఏదీ సాటిరాదన్నారు.

చంద్రబాబు అమరావతి రూపశిల్పి అని కొనియాడారు రఘురామ.. అమరావతిని సెల్ఫ్‌ ఫైనాన్సింగ్ మోడల్‌గా రూపొందించారన్నారు. రైతుల పాదయాత్రను అడ్డుకునేందుకు ప్రభుత్వం ఎన్నో కుట్రలకు పాల్పడిందన్నారు. మహిళలని కూడా చూడకుండా ఎన్నో ఇబ్బందులకు గురి చేశారని, చివరికి బయో టాయిలెట్లను కూడా అడ్డుకున్నారని ప్రభుత్వంపై రఘురామ మండిపడ్డారు.

తెదేపా అధినేత చంద్రబాబు సభావేదికపై వచ్చిన తర్వాత ఆయన్ను రఘురామ ఆలింగనం చేసుకున్నారు. ఈ సందర్భంగా రఘురామను చంద్రబాబు అభినందించారు.

ఇదీ చదవండి