రాష్ట్రంలో నైపుణ్యాభివృద్ధి కేంద్రాల ఏర్పాటుపై ముందడుగు

పార్లమెంటరీ​ నియోజకవర్గాల్లో ఒకటి చొప్పున నైపుణ్యాభివృద్ధి కేంద్రాలను ఏర్పాటు చేస్తామన్న రాష్ట్ర ప్రభుత్వం.. ఆ దిశగా చర్యలు మొదలుపెట్టింది. ఈ ప్రక్రియకు సంబంధించి మార్గదర్శకాల రూపకల్పనకు ఓ టాస్క్​ఫోర్స్​ను ఏర్పాటు చేస్తూ ఉత్తర్వులు జారీ చేసింది.

రాష్ట్రంలో పార్లమెంటరీ నియోజకవర్గాల వారీగా నైపుణ్యాభివృద్ధి కేంద్రాల ఏర్పాటుకు రాష్ట్ర ప్రభుత్వం టాస్క్​ఫోర్స్ ఏర్పాటు చేసింది. నైపుణ్యాభివృద్ధి కేంద్రాల ఏర్పాటుకు సంబంధించి మార్గదర్శకాలను రూపొందించేందుకు ఈ కమిటీ ప్రభుత్వానికి సిఫార్సులు చేయనుంది. ముఖ్యమంత్రి జగన్ ఆదేశాల మేరకు మంత్రులు, ఉన్నతాధికారులతో కూడిన కమిటీని ఏర్పాటు చేస్తూ పరిశ్రమల శాఖ ముఖ్యకార్యదర్శి రజత్ భార్గవ ఉత్తర్వులు జారీ చేశారు. పరిశ్రమలు, వాణిజ్యం, ఐటీ శాఖ మంత్రి ఛైర్మన్​గా... విద్యాశాఖ మంత్రి కో- ఛైర్మన్​గా ఈ కమిటీని ఏర్పాటు చేశారు. ప్రభుత్వ ప్రధాన కార్యదర్శి కన్వీనర్​గా... అలాగే కమిటీ నియమించే నిపుణులు సభ్యులుగా ఉండనున్నారు. తక్షణమే ఈ ఉత్తర్వులు అమల్లోకి వస్తాయని ఆదేశాల్లో పేర్కొన్నారు.