ప్రాజెక్టులపై ఏపీ, తెలంగాణల ఫిర్యాదుల పర్వం(Water dispute between Telangana and AP) కొనసాగుతోంది. ఆంధ్రప్రదేశ్ గాలేరు-నగరి ప్రాజెక్టు విస్తరణ చేపట్టకుండా చర్యలు తీసుకోవాలని కృష్ణానదీ యాజమాన్య బోర్డుకు తెలంగాణ నీటిపారుదల శాఖ ఇంజినీర్ ఇన్ చీఫ్(Water dispute between Telangana and AP) గురువారం లేఖ రాశారు. ప్రస్తుతం ప్రాజెక్టు విస్తరణ చేపట్టడంతో పాటు స్వరూపాన్నే మారుస్తున్నారని, దీనిపై చర్య తీసుకోవాలని కోరారు. మరోపక్క గోదావరి బేసిన్లో నీటి లభ్యతను అంచనావేసి రెండు రాష్ట్రాల మధ్య పంపిణీ జరిగేవరకు సీతారామ ఎత్తిపోతల సమగ్ర ప్రాజెక్టు నివేదిక (డీపీఆర్)ను ఆమోదించవద్దని ఆంధ్రపద్రేశ్‌ గోదావరి బోర్డు(Water dispute between Telangana and AP)ను కోరింది. ఏ ప్రాజెక్టు డీపీఆర్‌ను ఆమోదించవద్దని గోదావరి బోర్డుకు, కేంద్రజల్‌శక్తి మంత్రిత్వశాఖకు లేఖ రాసిన ఆంధ్రప్రదేశ్ ఒక రోజు తిరగకముందే సీతారామ ఎత్తిపోతలను ఆమోదించవద్దంటూ మరో ఉత్తరం పంపింది. ఇందులో ఏం పేర్కొన్నదంటే...
వాప్కోస్‌ నివేదిక ప్రకారం గోదావరిలో 13.64 టీఎంసీల లోటు ఉంది. ఎల్లంపల్లి దిగువన, సీతారామ ఎత్తిపోతల వరకు ఆంధ్రప్రదేశ్, తెలంగాణకు ఉన్న వాటా 991.19 టీఎంసీలు. రాజీవ్‌, ఇందిరాసాగర్‌ దుమ్ముగూడెం ఎత్తిపోతల పథకాలకు ఉన్న 32 టీఎంసీలతో కలిపి రెండు రాష్ట్రాల వినియోగం 530.83 టీఎంసీలు. పోలవరం వద్ద వినియోగం 474 టీఎంసీలు కాగా, లోటు 13.64 టీఎంసీలు పోనూ 460.36 టీఎంసీలు మాత్రమే ఉంది. 70 టీఎంసీలతో సీతారామ ఎత్తిపోతలను చేపడితే లోటు 51.64 టీఎంసీలు అవుతుంది. కేంద్ర జలసంఘం ఆమోదించిన డీపీఆర్‌ల ప్రకారం తీసుకొంటే నీటి వినియోగమే 675.65 టీఎంసీలు. దీని ప్రకారం పోలవరం వద్ద లోటు 158.46 టీఎంసీలవుతుంది. పోలవరం నీటిలభ్యత (హైడ్రాలజీ ఆమోదం ప్రకారం) 561టీఎంసీలు కాగా, సీతారామ డీపీఆర్‌లో 460.36టీఎంసీలు మాత్రమే అని ఉంది. కాళేశ్వరం సమగ్ర ప్రాజెక్టు నివేదికకు పరిగణనలోకి తీసుకొన్న నీటి లభ్యతను ఆంధ్రప్రదేశ్ వ్యతిరేకించింది. సీతారామ ఎత్తిపోతల వల్ల ఇంకా నష్టం జరుగుతుంది. గోదావరిలో నీటి లభ్యతను అంచనావేసి రెండు రాష్ట్రాల మధ్య పంపిణీ జరగాల్సి ఉంది. ఈ నేపథ్యంలో సీతారామ ఎత్తిపోతల డీపీఆర్‌ను ఆమోదించవద్దని ఏపీ జలవనరులశాఖ కార్యదర్శి శ్యామలరావు లేఖలో పేర్కొన్నారు.