మా కొడుకు శవాన్నైనా చూపించండి.. జవాన్ తల్లిదండ్రుల వేడుకోలు

దేశ సరిహద్దుల్లో విధులు నిర్వహిస్తూ.. ప్రమాదవశాత్తు మరణించిన తమ కుమారుడి మృతదేహాన్ని అప్పగించాలని ఆ జవాన్ తల్లిదండ్రులు కోరుతున్నారు. మాతృభూమి మీద ప్రేమతో కుటుంబానికి దూరంగా ఉంటూ అంకితభావంతో విధులు నిర్వహించి... ప్రాణాలు కోల్పోయిన తమ కుమారుడిని కడసారి చూసేందుకైనా మృతదేహాన్ని తమకు అప్పగించాలని కన్నీరు మున్నీరు అవుతున్నారు.

తెలంగాణలోని కుమురం భీం ఆసిఫాబాద్​ జిల్లా కాగజ్​నగర్ పట్టణానికి చెందిన జవాన్ షాకిర్ హుస్సేన్ సరిహద్దు ప్రాంతమైన లద్ధాఖ్​లో విధుల నిర్వహిస్తూ... ప్రమాదవశాత్తు మరణించాడు. విధులు ముంగించుకొని తిరిగి బేస్​ క్యాంపునకు వస్తుండగా... కొండ చరియలు విరిగి ప్రమాదం సంభవించింది. ఈ ఘటనలో షాకిర్ చనిపోయినట్లు కుటుంబసభ్యులకు ఆర్మీ అధికారులు తెలిపారు.

మృతదేహాన్ని అప్పగించేందుకు ఏర్పాట్లు జరుగుతున్నాయని కూడా వారు వెల్లడించారు. పోస్ట్​మార్టం నిర్వహించగా... కరోనా పాజిటివ్ వచ్చిందని... మృతదేహం అప్పగించలేమని ఆర్మీ అధికారులు తెలిపినట్లు... షాకిర్ తండ్రి షేక్ హుస్సేన్ తెలిపాడు. కనీసం తమ కుమారుడి మృతదేహం ఫోటో అయిన పంపలేదని వాపోయారు.

దేశ రక్షణలో ఏ జవాన్ చనిపోయినా అధికారులు పరామర్శించేందుకు వస్తారని... కానీ తమ వద్దకు ఎవరు రాలేదని తెలిపారు. తమ కుమారుడు ఏమైనా దేశ ద్రోహా అంటూ ప్రశ్నించారు. కొవిడ్​ పాజిటివ్ వస్తే దాని నియమాల మేరకే అంత్యక్రియలు నిర్వహించాలని... కానీ తమకు కడసారి చూపుకుడా లేకుండా చేయడం ఎంతవరకు సమంజసం అంటూ ప్రశ్నించారు. కేంద్రమంత్రి రాజ్​నాథ్ సింగ్ చొరవ తీసుకుని తమ కుమారుడి మృతదేహాన్ని తమకు అప్పగించాలని కోరారు.

ఇదీ చూడండి: