అన్నదాన కార్యక్రమంలో ప్లాస్టిక్​ అన్నం.. గ్రామస్థుల ఆందోళన

తెలంగాణ.. కుమురం భీం ఆసిఫాబాద్​ జిల్లాలోని ఓ గ్రామంలో ప్లాస్టిక్ అన్నం కలకలం రేపింది. ఓ అన్నదాన కార్యక్రమంలో వడ్డించిన అన్నం.. ప్లాస్టిక్​దని తేలడంతో గ్రామస్థులు విక్రయించిన వ్యాపారిపై పోలీసులకు ఫిర్యాదు చేశారు. తినే ఆహారాన్ని సైతం కల్తీ చేస్తున్న ముఠాలను పట్టుకుని.. కఠినంగా శిక్షించాలని డిమాండ్ చేశారు.

తెలంగాణ.. కుమురం భీం ఆసిఫాబాద్ మండలంలోని గుండి గ్రామంలో పులాజి బాబా వార్షికోత్సవ కార్యక్రమం జరిగింది. ఇందులో భాగంగా అన్నదాన కార్యక్రమం ఏర్పాటు చేశారు. గ్రామస్థులంతా పాల్గొని భోజనాలు చేస్తుండగా.. పలువురు చిన్న పిల్లలు ఆ ఆహారాన్ని తినడానికి ఇబ్బందిపడ్డారు. ఇది గమనించిన పెద్దలు.. అనుమానంతో అన్నాన్ని క్షుణ్నంగా పరిశీలించారు. మంటలో వేసి చూడగా ప్లాస్టిక్​గా కాలిపోయింది. దీంతో ప్లాస్టిక్​ బియ్యంగా స్థానికులు నిర్థరించారు.

గ్రామస్థులంతా కలిసి బియ్యం కొనుగోలు చేసిన దుకాణం ఎదుట బైఠాయించారు. యజమాని వచ్చి సమాధానం ఇవ్వాలని డిమాండ్​ చేశారు. విషయం తెలుసుకున్న పోలీసులు ఘటనా స్థలానికి చేరుకున్నారు. దుకాణ యజమానిని అదుపులోకి తీసుకున్నారు.

బియ్యం, ఇతర ఆహార పదార్థాలను కల్తీ చేస్తున్న ఇలాంటి ముఠాలను పట్టుకోవాలని గ్రామస్థులు డిమాండ్​ చేశారు. ఇలాంటి ఘటనలు పునరావృతం కాకుండా కఠిన చర్యలు తీసుకోవాలని పోలీసులను కోరారు.