రాష్ట్రంలో కరోనా విజృంభించడానికి వైకాపా పాలనా వైఫల్యమే కారణమని టీడీఎల్పీ ఉపనేత నిమ్మల రామానాయుడు ఆరోపించారు. వైకాపా నేతలే ర్యాపిడ్ టెస్ట్ కిట్లతో పరీక్షలు చేసుకుని ఎక్కువగా పరీక్షలు చేస్తున్నామని చెబుతున్నారని విమర్శించారు. వాలంటీర్ల వ్యవస్థను పెట్టుకుని ఉచితంగా నిత్యావసర సరకులు, రేషన్ సరకులు ఇంటింటికీ ఎందుకు అందించలేక పోతున్నారో సమాధానం చెప్పాలని డిమాండ్ చేశారు.
ప్రభుత్వం వద్ద ఆదాయం ఉన్నా.. పేదవారికి సాయం చేయడం లేదని రామానాయుడు అన్నారు. మనుషుల ప్రాణాల కంటే అవినీతికే వైకాపా ప్రాధాన్యత ఇస్తోందని విమర్శించారు. వైకాపా నేతలు టెస్టింగ్ కిట్లలో రూ.30 కోట్ల అవినీతికి పాల్పడ్డారని.. పేదల ఇళ్ల స్థలాల పేరుతో భూ దందాలకు పాల్పడుతున్నారని ఆరోపించారు. పీపీఈ కిట్లు, మందుల కొనుగోళ్లపై శ్వేతపత్రం విడుదల చేయాలని రామానాయుడు డిమాండ్ చేశారు. రాష్ట్రంలోని ప్రతి పేద కుటుంబానికి 10 వేలు ఆర్థిక సాయం చేయాలన్నారు.