'నిర్భయ పేరుతో చట్టం... కానీ ఆమెకు ఇంకా న్యాయం జరగలేదు'

దిశ కేసులో నిందితులను ఎన్​కౌంటర్​ చేశారు. కానీ 2012లో జరిగిన నిర్భయ అత్యాచారం, హత్య కేసులో ఇప్పటికీ నిందితులకు శిక్ష పడలేదు. 2017లో సుప్రీం వారికి ఉరిశిక్ష విధించినా ఇంకా అమలు కాలేదని నెట్టింట విమర్శలు వెల్లువెత్తుతున్నాయి.

దేశవ్యాప్తంగా సంచలనం సృష్టించిన దిశ కేసు నిందితుల ఎన్​కౌంటర్​ పట్ల మెజారిటీ ప్రజలు సానుకూలంగానే స్పందిస్తున్నారు. ఘటన జరిగిన 9 రోజుల్లోపే నిందితులను ఎన్​కౌంటర్​ చేయడంపై హర్షాతిరేకాలు వ్యక్తమవుతున్నాయి. ఎక్కడ చూసినా దిశకు న్యాయం జరిగిందన్న గళమే వినిపిస్తోంది.

ఏడేళ్లైనా... న్యాయం జరగలేదు

కానీ 2012 డిసెంబర్​ 16న దిల్లీలో జరిగిన నిర్భయ హత్యాచారంలో నిందితులకు ఇంకా శిక్ష పడకపోవడంపై మళ్లీ దేశవ్యాప్తంగా చర్చమొదలైంది. నిర్భయ ఘటనలో మొత్తం ఆరుగురిని దోషులుగా గుర్తించగా... ఒక వ్యక్తి తీహార్​ జైల్లో ఆత్మహత్య చేసుకున్నాడు. మిగతా ఐదుగురిలో ఒకరు మైనర్​ కావడం వల్ల మూడేళ్ల తర్వాత విడుదలయ్యాడు. మిగతా నలుగురు దోషుల్ని జైళ్లోనే ఉంచారు.

దిశ కేసులో ఎన్​కౌంటర్​ చేసినట్లే..

2017 మే 5న సుప్రీంకోర్టు ఉరిశిక్ష విధించినప్పటికీ ఇంకా అమలు కాలేదు. అప్పటి నుంచీ ఇప్పటివరకూ జైల్లో ఉంచడం ఎందుకని...దిశ కేసులో ఎన్‌కౌంటర్ చేసినట్లే...చంపేయాలని నెటిజన్లు సోషల్​మీడియాలో పోస్టులు పెడుతున్నారు. లేదంటే కోర్టు ఆదేశాల ప్రకారం.. ఉరిశిక్షైనా వెంటనే అమలుచేయాలని డిమాండ్ చేస్తున్నారు.

నిర్భయ పేరు మీద ప్రత్యేకంగా ఓ చట్టమే తీసుకొచ్చినా....ఆమెకు మాత్రం న్యాయం జరగలేదని నిరసనలు వ్యక్తం అవుతున్నాయి. నిర్భయ చట్టం వచ్చిన తర్వాత కూడా అత్యాచారాలు, హత్యలు ఏం తగ్గలేదని ఎత్తిచూపుతున్నారు.