మిల్లర్ల మాయ.. రైతన్నకు దక్కని మద్దతు ధర!

మిల్లర్ల మాయతో రైతన్నలు మోసపోతున్నారు. తక్కువ ధరకే కష్టపడి పండించిన ధాన్యం అమ్ముకుంటున్నారు. మద్దతు ధరకే కొన్నామంటూ మిల్లర్లు నమోదు చేయిస్తున్నారు. విరుగుడు పేరుతో తూకంలో 25% వరకు కోత వేస్తున్నారు.

రబీలో ధాన్యం పండించిన రైతుకు మద్దతు ధర అందని ద్రాక్షే అవుతోంది. బస్తా (75 కిలోల)కు మద్దతు ధర రూ.1,416 ఉంటే.. రైతులకు రూ.850 నుంచి రూ.1,100 లోపే దక్కుతోంది. రైతు భరోసా కేంద్రాల్లో పేర్లు నమోదు చేసుకుని, కళ్లంలోనే ధాన్యం సేకరిస్తామని ప్రభుత్వం చెబుతున్నా.. క్షేత్రస్థాయిలో మిల్లరు చెప్పిందే ధర అవుతోంది. ఆర్‌బీకేలు, సేకరణ కేంద్రాల ద్వారా నేరుగా సేకరించినా చివరకు మిల్లరు వద్దకు వెళ్లేసరికి ఏదో ఒక సాకుతో ధర తగ్గిస్తున్నారు.

విరుగుడు వస్తోందని, నూక ఎక్కువగా ఉందని ఒక్కో బస్తాకు 8 నుంచి 25 కిలోల వరకు తూకం తగ్గిస్తున్నారు. అంటే సగటున రూ.200 నుంచి రూ.500 పైగా కోత పెడుతున్నారు. కృష్ణా జిల్లాలో పలుచోట్ల ఈ పరిస్థితి కనిపిస్తోంది. రైతులు మద్దతు ధరకు అమ్ముకున్నట్లే రికార్డుల్లో కనిపిస్తున్నా.. లాభం మాత్రం మిల్లర్లకే దక్కుతోంది. రాష్ట్రంలో ఈ ఏడాది రబీలో 21.75 లక్షల ఎకరాల్లో ధాన్యం సాగు చేశారు. 65 లక్షల టన్నుల ధాన్యం ఉత్పత్తి అవుతుందని.. అందులో 45 లక్షల టన్నుల వరకు సేకరించాలని పౌరసరఫరాలశాఖ లక్ష్యంగా నిర్ణయించింది.

అయితే.. రైతుల నుంచి 37 లక్షల టన్నుల వరకే రావచ్చని అధికారులు అంచనా వేస్తున్నారు. ఖరీఫ్‌ మొదలు కావస్తున్నా ఇప్పటి వరకు 1.84 లక్షల మంది రైతుల నుంచి 21 లక్షల టన్నుల ధాన్యం మాత్రమే సేకరించారు. గతంతో పోలిస్తే ఈ ఏడాది సన్న రకాల సాగు పెరిగింది. వాటికి ధర బాగానే ఉన్నా.. తెలంగాణకు వాహనాల రాకపోకలు నిలిచిపోవడం, బెంగళూరు, చెన్నై నుంచి కూడా వ్యాపారులు రాకపోవడంతో అమ్మకానికి ఇబ్బందులు ఎదురవుతున్నాయి. మిగిలిన రకాలను అమ్ముకుందామంటే మిల్లర్లు అయినకాడికి ధర తగ్గిస్తున్నారని రైతులు వాపోతున్నారు.

అమ్మాలంటే.. పోరాడాల్సిందే

కొనుగోలు కేంద్రాల ద్వారా రైతుల నుంచి ధాన్యం సేకరించి మిల్లరుకు పంపినా.. అక్కడ కొర్రీలు పెడుతున్నారు. దీంతో నేరుగా మిల్లరుతో మాట్లాడుకోమంటూ వారు చేతులెత్తేస్తున్నారు. ముఖ్యంగా దొడ్డు రకాల ధాన్యం అమ్ముకోవడానికి రైతులు పడుతున్న పాట్లు అన్నీ ఇన్నీ కావు. కృష్ణా జిల్లాలో ధాన్యంలో నూక అధికంగా ఉందని ధరలో కోత వేస్తున్నారు. ప్రభుత్వం చెప్పిన రకాలే సాగు చేసినా.. విరుగుడు అంటూ ధర తగ్గించడం ఏమిటని రైతులు ప్రశ్నిస్తున్నారు.

* గోదావరి జిల్లాల్లో బోండాల రకం అమ్ముకోవడానికి ఇబ్బందులు పడుతున్నారు. తూర్పుగోదావరి జిల్లా ముమ్మిడివరం మండలం అయినాపురం రైతు కె.సత్యనారాయణ నాలుగెకరాల్లో బొండాల రకం ధాన్యం సాగు చేశారు. నూర్పిడి చేసి నెల అయింది. ఎవరూ కొనకపోవడంతో 160 బస్తాల ధాన్యం కళ్లంలోనే ఉంది. కొనుగోలు కేంద్రానికి వెళ్తే పట్టించుకోవడం లేదు. ఇంటి దగ్గర బస్తాకు రూ.1,150 మాత్రమే ఇస్తామంటున్నారని ఆయన ఆవేదన వ్యక్తం చేశారు.

* తూర్పుగోదావరి జిల్లాలో ఒక రైతు.. ఎకరాన్నరలో 80 బస్తాల పైగా బొండాల రకం ధాన్యం పండించారు. నూర్చి నెల అవుతోంది. మద్దతు ధరకు అమ్ముకోవాలని రైతుభరోసా కేంద్రానికి వెళ్తే ఈ-కర్షక్‌ కాలేదని చెప్పారు. ఎలాగోలా తిరిగి నమోదు చేయించుకున్నారు. కొనుగోలు చేయమంటే.. ధాన్యం సేకరణ కేంద్రానికి పంపారు. వాళ్లేమో ఈ రోజు, రేపు అంటూ నెల నుంచి తిప్పుతున్నారు. చివరకు కలెక్టరేట్‌లోని టోల్‌ఫ్రీ నెంబరుకు ఫోన్‌ చేసి ఫిర్యాదు చేశారు. సేకరణ కేంద్రం సిబ్బంది వచ్చి..మీ ధాన్యం కొంటామని హామీ ఇచ్చారు. అయినా ఇంకా తీసుకెళ్లలేదు. ఇలా ఎంతమంది రైతులు పోరాటం చేస్తారు, ఎంతమందికి మద్దతు ధర దక్కుతుందని రైతులు ప్రశ్నిస్తున్నారు. ఈ ఇబ్బందులన్నీ పడలేక..తూర్పు, పశ్చిమ గోదావరి, కృష్ణా జిల్లాల్లో అధికశాతం రైతులు దళారులకే అమ్మేస్తున్నారు. వీటిని మద్దతుధరకే కొన్నట్లు రైతుల పాసుపుస్తకాలపై నమోదు చేయించుకుంటున్నారు. ప్రభుత్వం నిర్ణయించిన మద్దతు ధర మిల్లరుకు దక్కుతుండగా.. అన్నదాతకు బస్తాకు రూ.సగటున రూ.250 వరకు కోత పడుతోంది.

మద్దతు ధరకే కొనుగోలు

'మద్దతు ధరకే ధాన్యం కొనేలా చర్యలు తీసుకుంటున్నాం. తక్కువకు అమ్ముకోవాల్సిన పనిలేదు. సన్న రకాలు ఎక్కువమంది సాగు చేయడంతో మద్దతు ధర కంటే ఎక్కువగానే లభిస్తోంది. దీంతో కొంతమంది వేచిచూసే ధోరణిలో ఉన్నారు. తూర్పు, పశ్చిమ గోదావరి, కృష్ణా జిల్లాల్లో అధికశాతం సేకరణ పూర్తయింది. ప్రకాశం, నెల్లూరు, చిత్తూరు జిల్లాల్లో కోతలు కొంత ఆలస్యంగా పూర్తయ్యాయి. శ్రీకాకుళం, విజయనగరం, విశాఖపట్నం జిల్లాల్లో ఇప్పుడిప్పుడే మొదలవుతున్నాయి.'- - సూర్యకుమారి, ఎండీ, పౌరసరఫరాల సంస్థ

బస్తా ధాన్యంలో 25 శాతం పైగా కోత

100 బస్తాల ధాన్యం పండించి మిల్లుకు తోలితే.. మద్దతు ధర ప్రకారం 75 బస్తాలకే లెక్క కట్టి సొమ్ము ఇస్తున్నారు. సగటున 25 శాతం వరకు తూకం తగ్గిస్తున్నారు. ఈ విషయాన్ని అధికారుల దృష్టికి తీసుకెళ్లినా ఫలితం ఉండటం లేదని కృష్ణా జిల్లా రైతులు ఆవేదన వ్యక్తం చేస్తున్నారు. జి.కొండూరు మండలం వెలగలేరుకు చెందిన రైతులు ఈ నెల 16న మిల్లుకు ధాన్యం తోలగా.. సగటున ఒక్కో బస్తాకు రూ.900 మాత్రమే దక్కింది. అదేమని మిల్లరును ప్రశ్నిస్తే పెద్ద వాగ్వాదమే జరిగింది. చివరకు మా మిల్లు, మా ఇష్టం, మీరు ధాన్యమే తోల్లేదంటూ.. రైతుల్ని బలవంతంగా బయటకు పంపారు. విషయాన్ని ఉన్నతాధికారుల దృష్టికి తీసుకెళ్లినా న్యాయం జరగలేదని రైతులు వాపోయారు.

ఇదీ చదవండి: