మళ్లీ తెరపైకి మూడు రాజధానులు.. ఈనెల 21న బిల్లు..?

Three capitals Bill: మూడు రాజధానుల అంశం మళ్లీ తెరపైకి వచ్చింది. కొంతమంది ముఖ్యమంత్రిని కలిసి మూడు రాజధానుల బిల్లును మరోసారి అసెంబ్లీలో ప్రవేశపెట్టాలని కోరగా.. ఈనెల 21న బిల్లు ప్రవేశపెడతామని సీఎం చెప్పినట్లు పలువురు చెబుతున్నారు.

ప్రస్తుత శాసనసభ సమావేశాల్లోనే మూడు రాజధానులపై చర్చించి.. బిల్లును ప్రవేశ పెడతామని సీఎం జగన్‌ తెలిపారంటూ సోషల్‌ డెమోక్రటిక్‌ ఫ్రంట్‌ రాష్ట్ర అధ్యక్షుడు మాదిగాని గుర్నాథం వెల్లడించారు.

బాపట్ల ఎంపీ నందిగం సురేష్‌, 3 రాజధానుల శిబిరం నిర్వాహకులు, బహుజన పరిరక్షణ సమితి ఉద్యమ నాయకులు గుర్నాథం, బేతపూడి సాంబయ్య, ఆదాం తదితరులు గురువారం వెలగపూడిలోని సచివాలయం వద్ద ముఖ్యమంత్రిని కలిశారు.

ఈ సందర్భంగా శాసనసభలో మూడు రాజధానుల బిల్లును మరోసారి ప్రవేశపెట్టాలని కోరుతూ సీఎంకు వినతిపత్రం అందించారు. అనంతరం గుర్నాథం మాట్లాడుతూ.. ఈనెల 21న శాసనసభలో 3 రాజధానులపై చర్చించి, బిల్లు ప్రవేశ పెడతామని సీఎం చెప్పినట్లు పేర్కొన్నారు.