కోల్​కతాలో సీబీఐ అధికారుల నిర్బంధం

చిట్​ఫండ్​ కేసులో కోల్​కతా పోలీసు కమిషనర్​ను ప్రశ్నించడానికి వెళ్లిన సీబీఐ అధికారులను పోలీసులు అడ్డుకున్నారు.

కోల్​కతా పోలీసు కమిషనర్​ రాజీవ్​ కుమార్​ నివాసం వద్ద ఉద్రిక్త పరిస్థితులు చోటుచేసుకున్నాయి. చిట్​ఫండ్​ కుంభకోణంలో కమిషనర్​ను ప్రశ్నించేందుకు వెళ్లిన సీబీఐ అధికారుల బృందాన్ని పోలీసులు అడ్డుకున్నారు. అధికారులను బలవంతంగా సమీపంలోని పోలీసు స్టేషన్​కు తరలించారు.

చిట్​ఫండ్​ కుంభకోణం కేసును పోలీసు కమిషనర్ రాజీవ్​కుమార్ గతంలో​ దర్యాప్తు చేశారు. ఆ కేసుకు సంబంధించిన పత్రాలు, ఆధారాలు మాయమయ్యాయి. దీనిపై సీబీఐ నోటీసులకు రాజీవ్​కుమార్​ స్పందించడంలేదు. దీంతో 'రోజ్​వ్యాలీ', 'పోంజీ స్కామ్​ కేసు'ల విషయమై కమిషనర్​ను ప్రశ్నించడానికి సీబీఐ అధికారుల బృందం కమిషనర్ ఇంటికి వెళ్లింది.

"పోలీస్​ కమిషనర్ రాజీవ్​కుమార్​ విధులకు హాజరవుతున్నారు. జనవరి31న మాత్రమే సెలవులో ఉన్నారు. ఈ విషయంలో సరైన ఆధారాలు లేకుండా ఎలాంటి వార్తలు ప్రచురించినా, కఠిన చర్యలు తీసుకుంటాం. చట్టపరంగా పరువునష్టం దావా వేస్తాం"- కోల్​కతా పోలీసులు

రాజీవ్​కుమార్​ 1989 బ్యాచ్​ ఐపీఎస్​ అధికారి. పశ్చిమ బంగ​ కేడర్​కు చెందిన రాజీవ్​పై అనేక ఆరోపణలు ఉన్నాయి. పశ్చిమ బంగ ఎన్నికల సమయంలో ముందస్తు ఏర్పాట్ల సమీక్షకు రాజీవ్​హాజరుకాకపోవడం అప్పట్లో వివాదమైంది.