'అలా చేయకుంటే అధికారులపై చర్యలు తీసుకుంటాం'- రైల్వే శాఖ వార్నింగ్!

Railways On Wrong Train Data :రైళ్ల రాకపోకలకు సంబంధించి ప్రయాణికులకు సమాచారం ఇవ్వకపోవడం, ఇచ్చిన సమాచారం సమగ్రంగా లేకపోవడం వంటివి జరిగితే బాధ్యులైన అధికారులపై చర్యలు తీసుకోనున్నట్లు రైల్వేశాఖ తెలిపింది. ఈ మేరకు దేశంలోని మెుత్తం 17 జోన్లకు రైల్వే బోర్డు లేఖ ద్వారా ఆదేశాలు జారీ చేసింది. అన్ని రైల్వేస్టేషన్‌లో రైళ్ల స్థితిగతులపై ప్రదర్శించే బోర్డులు విశ్వసనీయతతో ఏకీకృత విధానంలో ఉండాలని సూచించింది. నేషనల్‌ ట్రైన్‌ ఎంక్వయిరీ సిస్టం- NTES వెబ్‌సైట్‌లోనూ రైళ్ల రాకపోకలు, కోచ్‌ల పరిస్థితులపై కచ్చితమైన సమాచారం ఉండాలని బోర్డు తెలిపింది. ఫ్లాట్‌ఫాంలపై ఆయా రైళ్ల రాకపోకలకు సంబంధించిన సమాచారం ఏర్పాటు చేసే సూచిక బోర్డులో రైళ్ల పేర్లు, నంబర్లు, నడుస్తున్న స్థితి ఉండాలని బోర్డు పేర్కొంది.