టీడీపీ ప్రచార రథంపై వైఎస్సార్సీపీ నాయకులు రాళ్ల దాడి - ఓ బాలుడికి గాయం - YSRCP Leaders mob attack

YSRCP Mob Attack on TDP Leader Surendra Babu in Anantapur District : ఎన్నికల కోడ్ వచ్చినా వైఎస్సార్సీపీ నాయకుల అరాచకాలు ఆగడం లేదు. అనంతపురం జిల్లా కుందుర్పి మండలం, వడ్డేపాళ్యంలో తెలుగుదేశం ప్రచార రథంపై వైఎస్సార్సీపీ మూకలు రాళ్ల దాడి చేశాయి. ఈ దాడిలో ఓ బాలుడికి రాయి తగలడంతో తలకు గాయమైంది. కళ్యాణదుర్గం టీడీపీ ఎమ్మెల్యే అభ్యర్థి అమిలినేని సురేంద్రబాబు ఆదివారం రాత్రి వడ్డేపాళ్యంలో ఎన్నికల ప్రచారం నిర్వహించారు. ఈ సందర్భంగా ప్రజలు అధిక సంఖ్యలో పాల్గొనడంతో ఓర్వలేని వైఎస్సార్సీపీ నాయకులు ఒక్కసారిగా రాళ్లతో దాడికి దిగారు.

ప్రచార రథంపైకి వైఎస్సార్సీసీ మూకలు రాళ్లు రువ్వడంతో అమిలినేనికి త్రుటిలో ప్రమాదం తప్పింది. ఒక రాయి ప్రచార రథానికి తాకి అక్కడే ఉన్న వీరేశ్​ అనే బాలుడి నుదిటికి తగలడంతో గాయమైంది. గాయపడిన బాలుడికి కూటమి ఎమ్మెల్యే అభ్యర్థి సురేంద్రబాబు చికిత్స చేయించారు. ప్రతిపక్ష నేతల ప్రచారాన్ని అడ్డుకునేందుకు యత్నిస్తున్న అధికార పార్టీకి కాలం చెల్లిందని అమిలినేని మండిపడ్డారు. ఈ ఘటనపై ఎస్పీకి ఫిర్యాదు చేసినట్లు చెప్పారు.