వాలంటీర్ల జీవితాలతో ఎమ్మెల్యే ఆడుకుంటున్నారు : టీడీపీ నేత చింతకాయల విజయ్​ - TDP Leader Vijay - TDP LEADER VIJAY

TDP Leader Vijay Protest YCP Leader Volunteer Meeting in Anakapalli District : ఎన్నికల నేపథ్యంలో సభలు, సమావేశాలకు ముందస్తు అనుమతి తప్పనిసరని ఎన్నికల రిటర్నింగ్​ అధికారి పదేపదే చెబుతున్నా వైసీపీ నాయకులు లెక్క చేయడం లేదని టీడీపీ రాష్ట్ర కార్యదర్శి చింతకాయల విజయ్​ ధ్వజమెత్తారు. వైసీపీ ఎమ్మెల్యే పెట్ల ఉమశంకర్​ గణేశ్​ మంగళవారం రాత్రి నర్సీపట్నంలో వాలంటీర్లతో రహస్యంగా సమావేశం నిర్వహించారని పేర్కొన్నారు. ఎమ్మెల్యే ఉమశంకర్ గణేశ్​పై ఎన్నికల కమిషనర్​ అధికారులు తక్షణమే చర్యలు తీసుకోవాలని డిమాండ్​ చేశారు.

ఎన్నికల నియమావళికి విరుద్ధంగా ఎమ్మెల్యే వాలంటీర్ల సమావేశంపై పూర్తి స్థాయిలో విచారణ జరిపించాలని అధికారులకు చింతకాయల విజయ్​ విజ్ఞప్తి చేశారు. ఎమ్మెల్యే వాలంటీర్లతో రహస్య సమావేశం నిర్వహించిన విషయం తెలుసుకున్న అధికారులు అక్కడికి రావడంతో గోడ దూకి పారిపోయడని ఎద్దేవా చేశారు. ఎన్నికల్లో నగదును పంచడానికి వాలంటీర్ల సమావేశాన్ని నిర్వహించారా? అని ప్రశ్నించారు. ఈ విషయంలో ఎమ్మెల్యేపై చర్యలు తీసుకోకుండా అమాయకులైనా వాలంటీర్లపై చర్యలు తీసుకోవద్దని పేర్కొన్నారు. ఈ విషయాన్ని ఎన్నికల ప్రధాన అధికారి ముఖేష్​ కుమార్​ మీనాకు దృష్టికి తీసుకెళ్తానని పేర్కొన్నారు.