దుర్గమ్మకు భక్తుల కానుకలు - రూ.18 లక్షల బంగారు మంగళసూత్రం, వెండి వాహనం - Donations to kanaka durgamma

Ornaments Donations to Kanaka Durgamma: భక్తులకు కొంగు బంగారంగా అనుగ్రహిస్తున్న బెజవాడ కనక దుర్గమ్మకు శరన్నవరాత్రి ఉత్సవాల సమయంలో భక్తులు అనేక కానుకలను సమర్పిస్తూ తమ మొక్కులు చెల్లించుకుంటున్నారు. గత రెండు రోజులుగా మూలవిగ్రహానికి భక్తులు సమర్పించిన వజ్రాల కిరీటం, సూర్యచంద్రాలను అలకరించారు. తాజాగా నేడు గుంటూరుకు చెందిన చేబ్రోలు పుల్లయ్య అనే భక్తుడు వెండితో చేసిన హంస వాహనాన్ని అమ్మవారికి కానుకగా సమర్పించారు. ఆరున్నర కేజీలకుపైగా వెండితో ఈ వాహనాన్ని తయారు చేయించారు. 

అదే విధంగా ప్రకాశం జిల్లా కొండపి గ్రామానికి చెందిన కల్లగుంట అంకులయ్య అనే మరో భక్తుడు సుమారు 18 లక్షల రూపాయల విలువైన బంగారు మంగళ సూత్రాన్ని అమ్మవారికి బహూకరించారు. ఈ కానుకలను ఆలయ ఈవో కె.ఎస్‌. రామరావుకు అందజేశారు. అమ్మవారికి భక్తితో కానుకలు సమర్పించిన భక్తులకు ఆయురారోగ్యాలు, అష్టైశ్వర్యాలు ప్రాప్తించాలని పండితులు ఆశీర్వచనం పలికారు. అనంతరం దాతలకు దర్శన అనంతరం శేష వస్త్రంతోపాటు, తీర్థ ప్రసాదాలు, అమ్మవారి చిత్రపటాన్ని అందజేశారు.