కౌన్సిలర్‌ నుంచి కేంద్రమంత్రిగా - శ్రీనివాసవర్మ రాజకీయ ప్రయాణం! - Srinivasa Varma Political Career

Union Minister Srinivasa Varma Political Career: కేంద్ర మంత్రివర్గంలో అనూహ్యంగా చోటు దక్కించుకున్న ముగ్గురు వ్యక్తుల్లో శ్రీనివాసవర్మ ఒకరు. 2024 సార్వత్రిక ఎన్నికల్లో కూటమి తరఫున నరసాపురం నుంచి పోటీ చేసిన ఆయన మంచి మెజార్టీతో విజయం సాధించారు. భూపతిరాజు శ్రీనివాసవర్మ ఒకప్పుడు కొందరికి మాత్రమే తెలియగా ఇప్పుడు దేశవ్యాప్తంగా పరిచయమైంది. అతని గురించి పూర్తి విషయాలు ఈ స్టోరీలో తెలుసుకుందాం.

Union Minister Srinivasa Varma Political Career:భూపతిరాజు శ్రీనివాసవర్మ ఒకప్పుడు కొందరికి మాత్రమే తెలిసిన ఈ పేరు ఇప్పుడు దేశవ్యాప్తంగా పరిచయమైంది. 2024 సార్వత్రిక ఎన్నికల్లో కూటమి తరఫున మంచి మెజార్టీతో విజయం సాధించిన శ్రీనివాస వర్మకు కేంద్ర మంత్రివర్గంలో అనూహ్యంగా చోటు లభించింది. కేంద్రమంత్రిగా ప్రమాణం చేసిన నరసాపురం ఎంపీ భూపతిరాజు శ్రీనివాసవర్మ 1967 ఆగస్టు 4న భీమవరంలో జన్మించారు. తండ్రి ప్రభుత్వ ఉద్యోగి. మాస్టర్‌ లైబ్రేరియన్‌ కోర్సు చదివిన వర్మ లైబ్రేరియన్‌గా ఉద్యోగం చేశారు. తర్వాత బీజేపీలో చేరిన శ్రీనివాసవర్మ రెండు దశాబ్దాల పైగా పార్టీలోనే కొనసాగుతున్నారు.

సంఘ్‌ పరివార్‌తో సత్ససంబంధాలు కలిగిన శ్రీనివాసవర్మ ఎబీవీపీలో చురుగ్గా పనిచేసి పార్టీలో గుర్తింపు పొందారు. 1992 నుంచి 95 మధ్యలో జిల్లా యువ మోర్చా అధ్యక్షుడిగా పనిచేశారు. 2008 నుంచి 2014 వరకు రెండు పర్యాయాలు బీజేపీ జిల్లా అధ్యక్షుడిగా కొనసాగారు. 2014లో భీమవరం పురపాలక వార్డు కౌన్సిలర్‌గా గెలుపొందారు. ఇన్‌ఛార్జి ఛైర్మన్‌గానూ సేవలందించారు. తాజాగా కూటమి తరఫున నర్సాపురం అభ్యర్థిగా పోటీచేసిన భూపతిరాజు శ్రీనివాసవర్మ వైఎస్సార్సీపీ అభ్యర్థి ఉమాబాలపై 2,76,802 ఓట్ల భారీ మెజార్టీతో విజయం సాధించారు. నర్సాపురం లోక్‌సభ స్థానంలో ఇప్పటివరకు ఎవరికీ రాని మెజార్టీ తెచ్చుకుని రికార్డు సృష్టించారు.

అంతకుముందు నర్సాపురం నుంచి గెలుపొంది కేంద్రమంత్రిగా సేవలందించిన కృష్ణంరాజుకు శ్రీనివాస వర్మ అత్యంత సన్నిహితుడు, ఆత్మీయుడు. ఈ ఎన్నికల్లో కృష్ణంరాజు సతీమణి ఆయన తరఫున ప్రచారం చేశారు. తన తమ్ముడిని గెలిపిస్తే కృష్ణంరాజును గెలిపించినట్లేనని ఓట్లు అభ్యర్థించారు. మరోవైపు సామాన్య కార్యకర్తగా పనిచేసిన వ్యక్తికి ఎంపీ అభ్యర్థిగా ఎలా అవకాశమిస్తారని పార్టీలోనే అంతర్గతంగా వ్యతిరేక ప్రచారం జరిగింది.

అవేమీ పట్టించుకోని బీజేపీ అగ్రనాయకత్వం వివాదరహితుడు, తొలి నుంచి పార్టీ కోసం క్రమశిక్షణగా పనిచేసిన వర్మవైపే మొగ్గు చూపింది. మూడోసారి ప్రధానిగా ఎన్నికైన మోదీ తన మంత్రివర్గంలో శ్రీనివాస వర్మకు అవకాశం కల్పించారు. అహర్నిశలు కష్టపడటం వల్లే తనకీ కేంద్రమంత్రి పదవి దక్కిందని శ్రీనివాస వర్మ అన్నారు. ప్రధాని మోదీ మంత్రివర్గంలో స్థానం దక్కడం తెలుగు రాష్ట్రాల్లో బీజేపీకి ఇచ్చిన గౌరవంగా భావిస్తున్నట్లు శ్రీనివాసవర్మ తెలిపారు.