సుప్రీం ధర్మాసనం మరో కేసులో బిజీ - తిరుమల లడ్డూ వివాదంపై శుక్రవారం విచారణ - SUPREME COURT ON TTD LADDU ROW

SUPREME COURT ON TIRUMALA LADDU GHEE ADULTERATION: తిరుమల లడ్డూ వివాదంపై సుప్రీంకోర్టులో శుక్రవారం ఉదయం విచారణ జరగనుంది. ధర్మాసనం మరో కేసులో బిజీగా ఉన్నందున రేపు ఉదయం 10.30 గంటలకు విచారణకు తీసుకోవాలని సొలిసిటర్ జనరల్‌ కోరారు.

SUPREME COURT ON TIRUMALA LADDU GHEE ADULTERATION: తిరుమల లడ్డూ కల్తీ అంశంపై సుప్రీంకోర్టు శుక్రవారం ఉదయం విచారణ జరపనుంది. శుక్రవారం ఉదయం పదిన్నర గంటలకు విచారణకు తీసుకోవాలని సొలిసిటర్​ జనరల్​ కోరగా, అందుకు జస్టిస్ గవాయ్ ధర్మాసనం అంగీకరించింది. సుప్రీం ధర్మాసనం మరో కేసు విచారణలో తీరిక లేకుండా ఉండటం వల్ల, ఈ కేసు ఇవాళ విచారణకు రాలేదు. మరో కేసు విచారణ ఆపి మరీ లడ్డూ కేసు విచారించడం భావ్యం కాదన్న సొలిసిటర్ జనరల్ సూచనను ధర్మాసనం పరిగణనలోకి తీసుకుంది.

కాగా తిరుమల లడ్డూ కల్తీ వ్యవహారంపై సెప్టెంబర్ 30వ తేదీన సుప్రీంకోర్టులో విచారణ జరిగింది. సుప్రీంకోర్టు పర్యవేక్షణలో విచారణ జరపాలంటూ బీజేపీ నేత సుబ్రమణ్యస్వామి, వైఎస్సార్సీపీ ఎంపీ వైవీ సుబ్బారెడ్డి సహా నలుగురు వేర్వేరుగా దాఖలు చేసిన పిటిషన్లను జస్టిస్ బి.ఆర్.గవాయ్, కె.వి.విశ్వనాథన్‌తో కూడిన సుప్రీంకోర్టు ధర్మాసనం విచారణ చేపట్టింది.

విచారణ సందర్భంగా ప్రస్తుతం ఆంధ్రప్రదేశ్​ ప్రభుత్వం ఏర్పాటు చేసిన సిట్‌ సరిపోతుందా లేదా కేంద్రం నుంచి ఎవరినైనా నియమించాలనే విషయంపై కేంద్ర సొలిసిటర్‌ జనరల్‌ తుషార్‌ మోహతా అభిప్రాయాన్ని ధర్మాసనం కోరింది. దీనికి సొలిసిటర్‌ జనరల్‌ కొంత సమయం కోరడంతో తదుపరి విచారణను గురువారం మధ్యాహ్నానికి వాయిదా వేసింది. అయితే నేడు ధర్మాసనం మరో కేసులో బిజీగా ఉన్నందున శుక్రవారం ఉదయం విచారణ జరగనుంది.